Мутаноглу: „Добивме информации дека нашите колеги се испитани од страна на обвинителите во Египет“

АНКАРА (АА) - Заменик-генералниот директор на Агенција Анадолија (АА), Метин Мутаноглу, денеска изјави дека добил информации дека вработените на АА, кои беа приведени во полициската рација во нивната канцеларија во Каиро, биле испитани од страна на египетските обвинители.

„Сега добивме информации дека нашите колеги биле испитувани во обвинителската канцеларија во Египет“, изјави Мутаноглу во живо за Турската радио-телевизија (ТРТ).

Египетската полиција во вечерните часови на 14 јануари изврши упад во Канцеларијата на АА во Каиро и потоа приведе четворица вработени, меѓу кои и еден државјанин на Турција, и ги одведе во непознат правец.

Турција остро го осудува ваквиот потег и повикува на нивно итно ослободување.

Мутаноглу, според информациите кои ги добил од египетското Министерство за внатрешни работи, истакна дека египетската официјална новинска агенција ја обвинува АА и нејзините вработени дека објавуваат лажни вести и дека работат против интересите на Египет.

„Ние знаеме дека тие ги приведоа нашите колеги со бесмислени тврдења. Ова е нов развој“, изјави тој, нагласувајќи дека египетските власти не одговориле на ниту една од иницијативите од Министерството за надворешни работи по рацијата.

„Според оваа нова изјава, тие дадоа објаснување дека се спроведува истрага со тврдење дека АА е против националните интереси на Египет и дека надвор прикажува лоша слика за него“, рече Мутаноглу.

Тој нагласи дека Египет го направил истото на медиумите кои сакал да ги замолчи, додавајќи дека затвориле многу локални и надворешни медиуми.

„Истото ни го прават и нам“, изјави заменик-генералниот директор на АА.

Мутаноглу истакна дека АА е многу престижна новинска агенција во арапскиот свет, и додаде: „Затоа што АА е позната по својата непристрасност. Позната е по својата длабинска содржина во нејзините вести и по тоа што бара сите страни да зборуваат.“

Тој нагласи дека египетското Претседателство било претплатник на Агенција Анадолија до пред неколку години.

„Ова е важна информација“, изјави Мутаноглу, додавајќи дека агенцијата не е загрижена за интересите на Египет.

„Ние сме медиум и ние секако имаме обврска да ги пренесуваме настаните таму на начин на којшто тие и се одвиваат“, изјави тој.

- Египетската администрација никогаш не ни одобри акредитација -

Зборувајќи за тврдењата дека постои недостиг на документ, Мутаноглу се осврна на првиот слободно избран претседател на земјата, Мухамед Морси, кој беше соборен од власта за време на пуч и кој почина за време на судењето под обвиненија за шпионажа минатата година.

„Ние сме институција која секогаш имала комплетна документација и беше акредитирана до 2013 година [кога се случи воениот пуч]“, изјави тој, додавајќи дека нивните документи се наоѓаат во египетската администрација, но дека таа ниту ги прифатила, ниту ги одбила.

„Тие ни велат ’Можете да работите‘, но тоа не го формализираа и го оставија така“, изјави тој, додавајќи дека канцеларијата на агенцијата во Египет работи осум години и дека секоја година ги комплетира сите потребни документи.

„Администрацијата на Египет никогаш не ни пристапи за акредитација. Ова не се случува само со нас, тоа им го прават на сите странски медиуми“, нагласи тој.

Мутаноглу изјави дека пред две години АА ѝ понудила на египетската новинска агенција да работат заедно и да работат на развивање и подобрување на односите меѓу Египет и Турција и дека нивната понуда била добредојдена.

Тој истакна дека денес во Египет постои пучистичка администрација која ги замолчува сите гласови што зборуваат против неа.

„Затоа, фактот што тие не ни дадоа лиценца во оваа смисла не ја спречува нашата работа“, рече тој, додавајќи дека агенцијата го плаќа данокот на Египет без одложување, како и даноците на работниците.

Мутаноглу рече дека не постои проблем во врска со документите и дека агенцијата секогаш ја доставува својата апликација.

„Но, тие се против Агенција Анадолија и против сите други странски медиуми од денот на пучот“, истакна Мутаноглу.