ОАЕ подготвени да се приклучат на напорите за повторно отворање на Ормускиот Теснец

ВАШИНГТОН (АА) - Обединетите Арапски Емирати (ОАЕ) се подготвени да ги поддржат напорите предводени од Соединетите Американски Држави (САД) за повторно отворање на Ормускиот Теснец со употреба на сила, објави денес „Волстрит џурнал“, пренесува Анадолу.

Повикувајќи се на арапски официјални претставници, весникот објави дека ОАЕ лобираат за резолуција на Советот за безбедност на ОН со која би се одобрила воена акција и ги повикуваат САД и воените сили во Европа и Азија да формираат коалиција за обезбедување на стратегискиот воден пат.

Според весникот, државата од Персискиот Залив, исто така, ја разгледува потенцијалната улога на војската. како операции за расчистување на мини, додека ја преиспитува опцијата да стане директна страна во конфликтот за првпат.

Во соопштението, цитирано од „Волстрит џурнал“, Министерството за надворешни работи на ОАЕ истакнува дека постои „широк глобален консензус дека слободната пловидба низ Ормускиот Теснец мора да биде зачувана“, укажувајќи на меѓународната осуда на прекините на овој воден пат.

Американско-израелската војна со Иран и растечките тензии во Ормускиот Теснец ги нарушија регионалните енергетски текови, придонесувајќи за загриженост во поглед на снабдувањето, како и за притисокот за раст на глобалните цени.

На 2 март Иран објави ограничување на пловидбата по стратегискиот воден пат, предупредувајќи дека може да нишани кон бродовите доколку транзитираат без координација во него.

Околу 20 отсто од глобалната испорака на нафта поминува дневно низ теснецот, а поради зголемената несигурност пораснаа цените на нафтата, како и трошоците за испорака и осигурување.