Околу 800.000 Палестинци на северот на Појасот Газа немаат пристап до здравствени услуги

ГАЗА (АА) - Околу 800.000 Палестинци во северниот дел на Појасот Газа во моментов се без здравствени услуги, соопшти Министерството за здравство со седиште во Газа, јавува Анадолу.

Министерството предупреди на, како што ги нарече, „актите на геноцид извршени од Израел на северот на Појасот Газа“.

Израелската окупација намерно има за цел да ја поткопа инфраструктурата на здравствената заштита во северниот дел на Газа, рече портпаролот на Министерството, Ашраф ал-Кудра.

„Капацитетот на болницата Ал-Ахли во градот Газа е надминат поради големиот број ранети луѓе префрлени во таа установа“, рече Ал-Кудра, повикувајќи на меѓународна поддршка и заштита од интензивираните израелски бомбардирања.

Министерството во вторникот соопшти дека повеќе од 400.000 Палестинци во северниот дел на Газа сега се целосно без медицински услуги додека геноцидот над палестинскиот народ продолжува.

Израел во петокот ја продолжи својата воена офанзива врз Појасот Газа, по завршувањето на еднонеделното хуманитарно примирје со палестинската група Хамас.

Најмалку 16.248 Палестинци загинаа, а над 43.616 се ранети во немилосрдните воздушни и копнени напади врз енклавата од 7 октомври по прекуграничниот напад на Хамас.