Палестинскиот свештеник Авад: „Се пресекуваат виталните артерии на Палестина“

ИСТАНБУЛ (АА) - Илјас Авад, духовниот водач на православната заедница во градот Рамала на окупираниот Западен Брег, во врска со зголемените израелските напади врз Палестинците рече дека „се пресекуваат виталните артерии на Палестина“, јавува Анадолу.

Авад учествуваше на Европскиот самит за Палестина кој се одржа во Истанбул, и во изјава за АА говореше за зголемените напади на Израел врз Палестинците.

Тој нагласи дека на овој самит учествувал со делегација составена од муслимански и христијански свештени лица, под водство на махмуд ел-Хабаш, главен судија на Палестина.

„Доаѓаме од Палестина која овие денови е ранета. Се пресекуваат виталните артерии на Палестина. Децата на нашиот народ особено во Појасот Газа и Западниот Брег се изложени на напади, прекршувања и приведувања“, рече тој.

Авад истакна дека сите Палестинци, било муслимани или христијани, се изложени на нападите на Израел.

„Палестинскиот народ е еден, било христијани или муслимани. На тоа што се изложени муслиманите, се изложени и христијаните. Сите ние во исти редови ја браниме Палестина и нашите свети нешта. Особено го браниме Кудс кој е изложен на јудаизација“, додаде тој.

Палестинскиот свештеник упати апел до меѓународната заедница да ја поддржи палестинската кауза.

„Целиот свет го повикуваме да застане покрај нашата палестинска кауза со цел формирање на слободна палестинска држава со главен град Кудс [Ерусалим]“, рече Авад.

Тој истакна дека мирот на Блискиот Исток може да дојде само преку формирање на палестинска држава, и додаде: „Ние како Палестинци први ја пружаме раката за мир.“

„Убивањето невини деца и жени е крајно опасно и ја разурнува Палестина. Денеска го повикавме светот да ја запре деструктивната војна [во Палестина]. Како палестински народ, ние не го гледаме ова од перспектива на христијанин или муслиман. Исто како што беа бомбардирани џамиите, беа бомбардирани и црквите. Како што беа бомбардирани куќите на муслиманите, беа бомбардирани и куќите на христијаните“, рече тој, додавајќи дека Израел објави војна на целиот палестински народ, вклучувајќи ги сите негови светилишта, историја, села и градови.

Авад нагласи дека оваа година ги откажале божиќните прослави, и дека ќе организираат само верски литургии.

„Се наоѓаме во првите редови за да ја браниме нашата кауза. Се надеваме дека Божиќ ќе донесе формирање на палестинска држава и ослободување на Палестинците, тоа ќе биде наш празник“, истакна свештеникот Авад.

Инаку, на Европскиот самит за Палестина организиран во Истанбул учествуваа голем број свештеници, професори и политичари од 50 земји од светот.