САД уништија позиции на Хусите во Црвено Море

ВАШИНГТОН (АА) - Соединетите Американски Држави (САД) уништија позиции на Хусите во Јемен, соопшти Централната команда на САД (ЦЕНТКОМ), јавува Анадолу.

„Помеѓу 12:15 часот и 14:40 часот (според времето во Сана) на 8 април силите на Централната команда на САД (УСЦЕНТКОМ) успешно се ангажираа и уништија систем за противвоздушна одбрана со два проектила подготвени за лансирање, копнена контролна станица во области на Јемен контролирани од страна на Хусите и еден беспилотен воздушен систем лансиран над Црвеното Море од страна на Хусите од Јемен, поддржани од Иран“, соопшти ЦЕНТКОМ на социјалната мрежа X.

Се додава дека нема повредени и нема штета пријавени од американски, коалициски или комерцијални бродови.

„Одделно, речиси во 8:00 часот (според времето во Сана) на 7 април, беше лансирана противбродска балистичка ракета од област во Јемен контролирана од Хусите кон Аденскиот Залив, каде што коалицискиот брод го придружуваше М/В Хоуп Ијланд, товарен брод на Маршалските Острови, во сопственост на Велика Британија“, се вели во соопштението, додавајќи дека нема пријавени повредени или штета.

Ова беше петто забележано лансирање ракета против овој коалициски брод и М/В Хоуп Ијланд, додаде ЦЕНТКОМ.

САД се посветени на заштитата на слободата на навигација и меѓународните води да бидат „побезбедни“ за коалициските и трговските бродови, се вели во соопштението.

Јеменската група Хуси гаѓаше товарни бродови во Црвеното Море во сопственост или управувани од израелски компании или кои транспортираат стоки до и од Израел во знак на солидарност со Појасот Газа, кој е под израелски напад од 7 октомври.

Црвеното Море е еден од најчесто користените поморски патишта во светот за испорака на нафта и гориво.

Американскиот секретар за одбрана Лојд Остин неодамна најави формирање мултинационална мисија, Операција Просперитет Гардијан, за да им се спротивстави на нападите на Хусите.