Со учество на 11 држави, на состанокот во Париз разговарано за ситуацијата во Сирија

ВАШИНГТОН (АА) - Американскиот Стејт департмент објави дека претставници на 11 држави и две меѓународни организации разговарале во Париз за ситуацијата во Сирија, јавува Агенција Анадолија (АА).

Наведено е дека на 28 април во Париз се сретнале претставници на Арапската лига, Европската Унија, Египет, Франција, Германија, Ирак, Јордан, Норвешка, Катар, Саудиска Арабија, Турција, Велика Британија и САД.

Во соопштението се нагласува дека на состанокот била истакната трајната определеност за ублажување на страдањата на сирискиот народ и била поздравена 6-тата Бриселска конференција за иднината на Сирија и регионот, чиј домаќин ќе биде Европската Унија (ЕУ).

На состанокот е укажано на итноста да се продолжи со обезбедување на значајната и адекватна поддршка за сириските бегалци и земјите домаќини.

„Ја повторивме нашата непоколеблива поддршка за напорите на специјалниот пратеник на Обединетите нации за Сирија, Геир Педерсен, за унапредување на политичкото решение за ставање крај на сириската криза врз основа на резолуцијата 2254 на Советот за безбедност на ОН и почитување на единството и територијалниот интегритет на Сирија“, се истакнува во соопштението.