Уапсен четвртиот американски државјанин обвинет за заговор за убиство на Мадуро во Венецуела

БОГОТА (АА) - Венецуела го уапси и четвртиот американски државјанин поврзан со наводниот заговор за атентат на претседателот Николас Мадуро, потврди вчера министерот за внатрешни работи Диосдадо Кабело, известува Анадолу.

Министерот Кабело рече дека приведениот Американец фотографирал стратегиски инсталации.

„Го следевме. Тој беше фатен овде, во Каракас, како фотографира електрични и нафтени инсталации, воени единици“, рече Кабело.

Американецот им се придружи на тројцата американски државјани, двајца Шпанци и еден Чех, кои беа уапсени во Венецуела последниве неколку недели и од властите на земјата обвинети за заговор за убиство на претседателот Мадуро и други високи функционери.

Портпаролот на американскиот Стејт департмент за Агенција Анадолу изјави дека е запознаен со извештаите за можно апсење на уште еден американски државјанин.

„Свесни сме за непотврдените извештаи за дополнителни апсења во Венецуела. Нашата способност да обезбедиме помош за американските граѓани во Венецуела е сериозно ограничена. Внимателно работиме на дополнителни информации“, рече портпаролот.

Стејт департментот ги отфрли обвинувањата за вмешаност на САД во плановите за соборување на Мадуро.

„Сите тврдења за вмешаност на САД во заговор за соборување на Мадуро категорично се лажни. Соединетите Американски Држави продолжуваат да го поддржуваат демократското решение за политичката криза во Венецуела“, информираат од Стејт департментот.

Шпанската Влада, исто така, негираше вмешаност во наводниот заговор и побара информации за приведените Шпанци.

Во вторникот шпанскиот министер за надворешни работи Хозе Мануел Албарес побара од венецуелскиот колега Иван Гил да го извести каде се наоѓаат шпанските затвореници и да ги објасни обвиненијата против нив, како што тоа го налага Виенската конвенција.