Украина: Руската војска продолжува со нападите на цивилни објекти

КИЕВ (АА) – Руската војска во текот на ноќта изврши напади врз цивилни објекти во украинските градови Киев, Чернихив, Харков, Мариупол..., јавува Агенција Анадолија (АА).

Според информациите на украинските локални администратори и државните институции, руската војска продолжила со нападите со авиони и проектили, гаѓајќи цивилни објекти во земјата.

Гувернерот на Чернихив, Вјачеслав Чауш, рече дека Русите континуирано го бомбардираат градот.

Според неговите зборови, руските сили продолжиле со нападите на цивилната инфраструктура и дека во последните 24 часа загинале 53 цивили.

Во главниот град Киев најмалку едно лице загина, а три се повредени во ракетен напад врз станбена зграда.

Украинската служба за вонредни состојби наведе дека ракета погодила зграда во Киев, при што е причинета голема материјална штета. Евакуирани се околу 30 луѓе.

Проектил погоди и образовна установа во населбата Мерефа во градот Харков. Нема жртви, а во зградата избувна пожар.

Сергеј Орлов, заменик-гувернер на Мариупол, рече дека околу 90 отсто од станбените објекти биле цел на напади.

Наведе дека објектите се или целосно уништени или оштетени.