Роналдињо започнува светска лига во уличен фудбал

ЛОС АНЏЕЛЕС (АА) – Бразилскиот легендарен фудбалер Роналдињо започнува светска лига во уличен фудбал за да им даде шанса на талентираните млади играчи да ги покажат своите вештини и да го следат истиот пат до ѕвездите како поранешниот играч на Барселона, пренесува Анадолу.

„Светската улична лига на Роналдињо ќе започне кон крајот на 2023 година“, објавија денес организаторите.

На почетокот ќе се спроведе пробен процес на социјалните мрежи, каде што играчите на уличниот фудбал од сите возрасти ќе можат да ги постават своите најдобри вештини и трикови во обид да се вклучат во еден од тимовите на натпреварувањето.

Меѓусебните натпревари во вештини ќе се одржуваат во поголемите градови низ светот, а тимовите ќе се натпреваруваат во лигата за титулата „РГСЛ шампиони“ и ќе станат дел од она што ќе се вика Ronaldinho Globe Street Team.

„Веруваме дека ова е можност што се појавува еднаш во животот, со цел да им дадеме поддршка на играчите на иднината“, рече Роналдињо најавувајќи го проектот.

Засега не се објавени детали за точната локација и време на настанот.

За да ја оформи лигата, Роналдињо, двократниот најдобар играч во светот, ги здружи силите со спортскиот агент и поранешен играч Роберто де Асис Мореира и Софи Вотс, коосновачката на Лигата на легендите на Мајк Тајсон.

„Роналдињо и јас пораснавме во сиромашна заедница во Бразил. Од прва рака ја знаеме моќта на уличниот фудбал во охрабрувањето на младите и целосно сме посветени на откривањето и поддршката на играчите на уличниот фудбал низ светот преку RGSL“, рече Мореира.