Туркије: Бројот на загинати во разорните земјотреси порасна на 31.974

АНКАРА (АА) - Во земјотресите во јужниот дел на Туркије загинаа 31.974 лица, соопшти Агенцијата за управување со катастрофи и вонредни состојби (АФАД), пренесува Анадолу.

Наведено е дека 195.962 лица се евакуирани од подрачјето погодено од земјотресите.

АФАД соопшти дека по двата разорни земјотреси, регистрирани се уште 3.170 помали земјотреси.

На терен работат 35.249 припадници и членови на различни институции од Туркије и меѓународни спасувачки тимови.

На терен се 9.456 луѓе од други земји.

Психосоцијална поддршка е обезбедена на стотици илјади луѓе.

Два разорни земјотреси со јачина од 7,7 и 7,6 степени според Рихтеровата скала на 6 февруари ги погодија јужните делови на Туркије со епицентар во областа Кахраманмараш, а голем број спасувачки тимови сè уште ревносно работат на пребарување и спасување на луѓето затрупани во урнатините на зградите.