Maqedonia dhe Kosova për thellimin e bashkëpunimit tregtar

SHKUP (AA) - Ministri i Ekonomisë i Republikës së Maqedonisë, Kreshnik Bekteshi, ka pritur në një takim në Shkup, ministrin e Inovacioneve dhe Sipërmarrësisë së Republikës së Kosovës Besim Beqaj, me të cilin theksi është vendosur tek mundësitë për rritje të këmbimit tregtar mes dy vendeve, raporton Anadolu Agency (AA).

Në një deklaratë pas takimit, ministri Bekteshi tha se ka informuar mysafirin nga Kosova për planin e qeverisë për ndihmë të ndërmarrjeve të vogla dhe të mesme për rritje të konkurrentshmërisë për bashkëpunim me tregjet e rajonit dhe më gjerë.

“Obligimet që dalin nga Procesi i Berlinit na obligojnë që sa më shumë të intensifikojmë bashkëpunimin tregtar dhe ekonomik mes dy vendeve. U dakorduam që së bashku të krijohen grupe pune që sa më shpejtë të realizohet një takim mes dy qeverive ku do të identifikohet rrugët për rritje të bashkëpunimit tregtar”, tha Bekteshi.

Ministri Beqaj nga ana e tij tha se Maqedonia dhe Kosova kanë raporte të mira ekonomike, për avancimin e të cilave infrastruktura luan një rol shumë të rëndësishëm. Nga këtu, tha ai, shpresoj që nisma kosovare e cila është në përfundim e sipër për përfundimin e autostradës në pjesën e Kosovës do të gjejë lëvizje të shpejta edhe tek qeveria e Maqedonisë, sepse siç tha, kjo bëhet në të mirën e ekonomive dhe qytetarëve të të dyja vendeve.

“Kosova është duke bërë një investim të madh që do t'i ndihmojë edhe Maqqedonisë, dhe shpresoj që Maqedonia të ketë qartësi ekonomike dhe politike që të përfundojë këtë rrugë sa më shpejtë sepse nga momenti kur rruga ka shkuar në tjera orientime ka patur efekte negative në këmbimet tona tregtare. Ne synojmë të rrisim bashkëpunimin ekonomik përmes infrastrukturës. Faza tjetër e bashkëpunimit pasi të përfundojë rruga është bashkëpunimi i doganave dhe dy administratave tona”, tha Beqaj.

Për sa i përket ndërtimit të autostradës Prishtinë-Shkup, nga pjesa e Maqedonisë, ministri Bekteshi tha se qeveria në mbledhjen e djeshme ka caktuar afatet për ndërtimn e saj, punimet për të cilën do të fillojnë vitin tjetër.