Moldavi, Rama dhe Kovaçevski takohen me Zelenskyy-n

Kryeministrat e Shqipërisë dhe Maqedonisë së Veriut, Edi Rama dhe Dimitar Kovaçevski, kanë zhvilluar një takim të përbashkët me presidentin e Ukrainës, Volodymyr Zelenskyy, transmeton Anadolu.

Sipas njoftimit të qeverisë së Maqedonisë së Veriut, takimi u zhvillua në margjinat e Samitit të dytë të Komunitetit Politik Evropian që mbahet në Chișinău, Moldavi, ndërsa në takim ishte i pranishëm edhe zv/kryeministri i Maqedonisë së Veriut, Fatmir Bytyqi.

Kovaçevski theksoi mbështetjen e fortë që Maqedonia e Veriut i ka dhënë Ukrainës që nga fillimi i agresionit ushtarak të Moskës kundër Kievit në shkurt të vitit të kaluar.

"Maqedonia e Veriut dënoi agresionin brutal ushtarak që Rusia po kryen kundër Ukrainës së pavarur dhe sovrane. Ne mbështesim sovranitetin dhe integritetin territorial të Ukrainës dhe të drejtën e saj për të përcaktuar rrugën e saj. Ne kemi ofruar dhe do të vazhdojmë të ofrojmë mbështetje në çdo formë që Ukraina ka nevojë”, ka theksuar Kovaçevski.

Presidenti i Ukrainës, Zelenskyy, falënderoi për mbështetjen që populli ukrainas merr nga Maqedonia e Veriut dhe tha se ajo vjen në momente vendimtare.

“Ju nuk keni bërë kalkulime, keni qenë pranë nesh që nga dita e parë dhe populli ukrainas dhe ne e vlerësojmë këtë”, shtoi ai.

“Kryeministri Kovaçevski kujtoi se Maqedonia e Veriut është pjesë e grupit themelues për formimin e Gjykatës Speciale Ndërkombëtare për Krimet e Agresionit, me çka edhe kësaj radhe u pozicionuam qartë në anën e duhur të historisë. Ukraina është ndër prioritetet gjatë kryesimit të Maqedonisë së Veriut me OSBE-në, në të njëjtën kohë Maqedonia e Veriut mbështet integrimin euroatlantik të Ukrainës dhe përkushtimin ndaj politikës së dyerve të hapura të NATO-s”, thuhet në njoftimin e Qeverisë së Maqedonisë së Veriut.