Vuçiç: Serbia nuk do të anëtarësohet në NATO

Presidenti i Serbisë, Aleksandar Vuçiç, ka deklaruar se vendi i tij nuk do të anëtarësohet në aleancën ushtarake të NATO-s dhe përkundrazi do të mbrojë vetë tokën dhe hapësirën e saj ajrore, raporton Anadolu Agency (AA).

“Ne do t’i mbrojmë fëmijët tanë dhe të ardhmen, kemi mjaft ushtarë. Interesi ynë është në paqe dhe kompromise, por koha e pogromeve dhe persekutimit ka përfunduar”, tha Vuçiç në një tubim të Partisë Progresive Serbe (SNS) të tij gjatë fushatës elektorale në qytetin jugor Vranje.

Duke theksuar se ka “frikë” se çfarë mund të sjellin të tjerët në Serbi, Vuçiç tha se beson se populli do të zgjedhë saktë në zgjedhjet e përgjithshme të planifikuara për më 3 prill.

Rusia e ka kundërshtuar zgjerimin e NATO-s dhe e ka përmendur atë si një arsye për luftën që nisi muajin e kaluar në Ukrainë, megjithëse Kievi nuk ishte afër anëtarësimit me aleancën ushtarake.

Moska kundërshton veçanërisht anëtarësim në NATO për vendet me të cilat ndan lidhje historike të etnisë sllave dhe të krishterimit ortodoks, të tilla si Serbia.

Në rajonin e Ballkanit Perëndimor, Maqedonia e Veriut, Kosova dhe Shqipëria i janë bashkuar sanksioneve të Bashkimit Evropian (BE) dhe SHBA-së kundër Rusisë për shkak të luftës në Ukrainë. Serbia tha se mbështet integritetin territorial të Ukrainës, por nuk pranoi të vendosë sanksione ndaj Rusisë.

Vuçiç ka shërbyer si president i Serbisë që nga viti 2017 dhe aktualisht kërkon mandat të dytë, që sipas kushtetutës serbe do të ishte mandati i fundit i tij.