Argjentinë, mijëra qytetarë mblidhen në mbështetje të qeverisë

Mijëra argjentinas u mblodhën të mërkurën në kryeqytetin Buenos Aires në mbështetje të presidentit Alberto Fernandez, transmeton Anadolu Agency (AA).

Mbështetësit e koalicionit qeverisës Frente de Todos u mobilizuan në "Plaza de Mayo" përpara ndërtesës presidenciale Casa Rosada për të shënuar përvjetorin e kthimit të ish-presidentit Juan Domingo Peron më 17 nëntor 1972 pasi kaloi 17 vjet në ekzil pas grusht shtetit të vitit 1955 në të cilën ai u rrëzua.

Presidenti Fernandez shfrytëzoi rastin për të kundërshtuar kritikat e opozitës, duke thënë se "Fitorja nuk është të triumfosh, por të mos dorëzohesh kurrë", në lidhje me zgjedhjet legjislative afatmesme të cilat koalicioni i tij qeverisës i humbi të dielën.

"Kemi marrë mesazhin që na është dhënë. Ka shumë për të bërë. Nuk kam asnjë dyshim për këtë dhe ka shumë që presin që kjo qeveri të bëjë më shumë se ata", shtoi ai.

Duke iu referuar zgjedhjeve të përgjithshme, Fernandez tha: “Ne duhet të bëjmë atë që është e nevojshme për të siguruar një fitore të madhe në vitin 2023. Askush nuk na ka mundur. Është mundur vetëm ai që humb vullnetin për të luftuar”.

Presidenti theksoi nevojën për të arritur një marrëveshje me opozitën, megjithëse ai përjashtoi ish-presidentin Mauricio Macri dhe politikanin e ekstremit të djathtë Javier Milei, por do ta lërë derën hapur për të tjerët.

“Kam kërkuar që së bashku të mund të ndërtojmë disa politika bazë. Nëse Macri nuk dëshiron të flasë, le të mbetet vetëm me miqtë e tij që bëjnë biznes. Nëse Milei nuk dëshiron të flasë, le të qëndrojë i mbyllur me kolegët e tij, të cilët mohojnë diversitetin dhe mohojnë terrorizmin shtetëror. Nuk kemi çfarë të flasim me ta”, tha Fernández.

Opozita kritikoi natyrën festive të mobilizimit pas humbjes së koalicionit qeverisës. Presidenti Peron u internua në Spanjë pas një grushti shteti kundër qeverisë së tij në 1955.

Më vonë u kthye në Argjentinë më 17 nëntor 1972 dhe fitoi zgjedhjet e vitit 1973.

Çdo vit më 17 nëntor, mbështetësit e Peronit në vend shënojnë ditën e njohur në spanjollisht si "Dia de la Militancia".

Peronizmi, një lëvizje politike dhe sociale argjentinase e bazuar në idetë dhe trashëgiminë e Peronit, është gërshetuar thellë në peizazhin politik të Argjentinës që kur ai erdhi për herë të parë në pushtet në vitin 1943.

Ajo vazhdon të luajë një rol të rëndësishëm në politikën e vendit, duke bashkuar shumë sektorë të shoqërisë si një lëvizje shoqërore.

Si parti politike, ajo konsiderohet gjerësisht për mbrojtjen e të drejtave të punëtorëve, mbështetjen e sindikatave dhe fokusimin e industrisë kombëtare.