Mustafa Melih Ahıshalı
01 Janar 2018•Përditësim: 02 Janar 2018
STAMBOLL (AA) - Është rritur në dhjetë numri i personave që kanë humbur jetën gjatë protestave antiqeveritare në Iran, ndërkohë që të paktën 377 të tjerë janë arrestuar, transmeton Anadolu Agency (AA).
Agjencia Laburiste e Lajmeve e Iranit ILNA citoi deputetin nga qyteti Ize në provincën Huzitan, Hidajetullah Hadimi, të ketë thënë në një fjalim në Kuvend se "dy persona kanë humbur jetën në protestat e organizuara mbrëmë në qytetin Ize".
Ndërkaq, sipas deklaratave të zyrtarëve shtetërorë në qytete të ndryshme të Iranit, dhjetë persona kanë humbur jetën në tërë vendin që nga dita e enjte, kur filluan protestat, e deri më tani.
Siç njoftohet, 377 perosna janë arrestuar gjatë protestave, prej të cilëve 200 në Teheran, 100 në Erak, 60 në Isfahan, dhjetë në Provincën e Azerbajxhanit Perëndimor dhe shtatë në Rebatkerim.
Ndryshe, protestat në Iran filluan të enjten, pasi një grup u mblodh në qytetin Meshhed pa thirrje të asnjë partie politike për të protestuar kundër kushteve ekonomike në vend.
Protestat u shndërruan në protesta antiqeveritare dhe u përhapën në shumë qytete.
