Dy banorë të tjerë në Gaza vdesin nga uria në 24 orët e fundit

STAMBOLL (AA) - Ministria e Shëndetësisë në Gaza sot njoftoi se dy palestinezë të tjerë kanë vdekur nga uria dhe kequshqyerja në Rripin e Gazës në 24 orët e fundit, transmeton Anadolu.

Përditësimi erdhi një ditë pasi ministria raportoi 10 vdekje të ngjashme, duke nënvizuar katastrofën humanitare në enklavën e rrethuar.

Ministria në deklaratë tha se spitalet regjistruan dy vdekje të reja të lidhura me urinë dhe kequshqyerjen, duke e çuar numrin e përgjithshëm të vdekjeve nga uria në 113 që nga tetori 2023.

Izraeli që nga 2 marsi ka ngecur në zbatimin e një marrëveshjeje armëpushimi dhe shkëmbimi të të burgosurve me Hamasin dhe ka mbajtur të mbyllura kalimet kufitare të Gazës, duke lënë kamionë me ndihmë humanitare të bllokuar përgjatë kufirit.

Izraeli ka vrarë më shumë se 59.200 palestinezë, shumica prej tyre gra dhe fëmijë, në Rripin e Gazës që nga tetori 2023. Fushata ushtarake ka shkatërruar enklavën, ka shembur sistemin shëndetësor dhe ka çuar në mungesa të mëdha ushqimore.

Nëntorin e kaluar, Gjykata Ndërkombëtare Penale lëshoi urdhërarreste për kryeministrin izraelit Benjamin Netanyahu dhe ish-ministrin e tij të Mbrojtjes, Yoav Gallant, për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.