Forcat izraelite vrasin 31 palestinezë në Rripin e Gazës

GAZA/STAMBOLL (AA) - Forcat izraelite vranë të paktën 31 palestinezë dhe plagosën dhjetëra të tjerë në Rripin e Gazës, thanë mjekët të dielën, transmeton Anadolu.

Një burim mjekësor tha se pesë palestinezë u vranë dhe disa u plagosën në një sulm me dron izraelit në një tendë që strehonte civilë të zhvendosur në Al-Mawasi në qytetin jugor Khan Younis.

Gjithashtu disa fëmijë pësuan djegie të rënda pas sulmit ajror izraelit në zonën Al-Mawasi.

Dëshmitarët thanë se bombardimet e artilerisë izraelite u vunë flakën edhe pronave palestineze në zonën Qizan Abu Rashwan të qytetit.

Mjekët palestinezë gjetën trupat e gjashtë personave në Abasan al-Kabira në Khan Younis pas sulmeve izraelite. Një grua palestineze u vra gjithashtu nga zjarri izraelit në të njëjtën zonë.

Gjashtë persona që kërkonin të arrinin ushqim u vranë gjithashtu dhe dhjetëra të tjerë u plagosën nga të shtënat izraelite pranë një pike shpërndarjeje ndihmash në Rafah në Gazën jugore, thanë mjekët.

Veçmas, të shtënat izraelite vranë pesë palestinezë dhe plagosën më shumë se 15 të tjerë ndërsa prisnin ndihmë humanitare në zonën Al-Sudaniya në veriun e largët të Rripit të Gazës.

Një burim mjekësor tha se dy persona u vranë dhe të tjerë u plagosën në kampin e refugjatëve Nuseirat në Gazën qendrore.

Dy palestinezë u vranë, përfshirë një fëmijë, pasi një dron izraelit goditi shtëpinë e tyre në Nuseirat.

Një tjetër palestinez u vra nga zjarri i ushtrisë që synonte një shtëpi në kampin e refugjatëve Bureij në Gazën qendrore, shtoi burimi.

Në veri të Rripit të Gazës, tre palestinezë u vranë, përfshirë një fëmijë, në sulme të ndara izraelite në Qytetin e Gazës, sipas një burimi mjekësor.