Franca kërkon përfshirjen e Libanit në armëpushimin midis SHBA-së dhe Iranit

Franca tha sot se Libani duhet të përfshihet në çdo marrëveshje armëpushimi në Lindjen e Mesme dhe paralajmëroi për rreziqet në rritje të sigurisë në Ngushticën e Hormuzit dhe stabilitetin e brishtë rajonal, transmeton Anadolu.

Ministrja franceze e Mbrojtjes Catherine Vautrin bëri thirrje për një ndalim të menjëhershëm të sulmeve izraelite. "Duhet të ketë armëpushim në Liban", tha ajo në një intervistë me BFMTV-RMC.

"Dje ishte një ditë absolutisht dramatike për Libanin", shtoi Vautrin duke iu referuar sulmeve vdekjeprurëse izraelite.

Ministrja franceze tha se Libani nuk mund të lihet jashtë përpjekjeve diplomatike pas armëpushimit të shpallur midis SHBA-së dhe Iranit. "Sigurisht që Libani është i shqetësuar. Absolutisht duhet të përfshihet në marrëveshje", thekson ajo.

Vautrin vuri në dukje pasigurinë mbi sigurinë detare. "Nuk e di nëse Ngushtica e Hormuzit është e minuar apo jo", tha ajo duke iu referuar pretendimeve të mëparshme nga Garda Revolucionare e Iranit.

"Është e qartë se rruga e propozuar është në veri të ngushticës, përgjatë territorit iranian. Duke pasur parasysh informacionin që kemi sot, mund ta imagjinojmë se është një mënyrë për të kontrolluar kalimet", shtoi Vautrin.

Pavarësisht tensioneve, ajo tha se Franca aktualisht nuk po shqyrton vendosjen e forcave detare. "Ndërsa po flas me ju, nuk po flasim fare për dërgimin e fregatave", tha ministrja e Mbrojtjes ndërsa vuri në dukje se "asgjë nuk mund të përjashtohet për çminimin".

Ministri i Jashtëm francez Jean-Noel Barrot theksoi nevojën për stabilizimin e Libanit, duke thënë se Franca "dënon fuqimisht" sulmet izraelite.

"Sot është një ditë zie kombëtare në Liban dhe ne bashkohemi plotësisht me këtë", tha ai për "France Inter", duke paralajmëruar se Libani nuk duhet të lihet mënjanë mes zhvillimeve më të gjera gjeopolitike.

"Libani nuk duhet të jetë kurbani për një qeveri të pakënaqur sepse është arritur një armëpushim midis SHBA-së dhe Iranit", tha ai.

Barrot e përshkroi armëpushimin si të paqëndrueshëm, duke thënë se është "shumë i brishtë" dhe se është shumë herët për të folur për një periudhë pas luftës. Ai shtoi se negociatat e ardhshme të paqes pritet të jenë "të vështira".

“Është e qartë se trafiku i anijeve nuk po rrjedh ende pa probleme në Ngushticën e Hormuzit", tha Barrot duke theksuar se “liria e lundrimit në ujërat ndërkombëtare është një e mirë e përbashkët e njerëzimit”.

Ai hodhi poshtë çdo propozim që do të kërkonte që anijet të paguanin tarifa tranziti për Iranin.

Lidhur me Iranin, Barrot përsëriti qëndrimin e Francës se Teherani duhet të “heqë dorë nga posedimi i një arme bërthamore dhe mjetet për ta përvetësuar atë” si dhe “të heqë dorë nga përdorimi i raketave dhe dronëve të tij për të kërcënuar vendet në rajon”.