Shkalla e lindshmërisë në SHBA bie në nivelin më të ulët në vitin 2025

Shkalla e lindshmërisë në SHBA ka rënë në nivel të ri rekord të ulët në vitin 2025, duke vazhduar trendin e rënies pothuajse dydekadësh, sipas të dhënave të reja zyrtare të publikuara sot, transmeton Anadolu.

Shkalla e lindshmërisë ka rënë në 53,1 lindje për çdo 1.000 gra në moshë riprodhuese, nga 53,8 në vitin 2024, njoftoi Qendra Kombëtare e Statistikave të Shëndetit. Numri total i lindjeve gjithashtu ka rënë me 1 për qind, në rreth 3,6 milionë.

Rënia ka vazhduar që nga viti 2007, raportoi "The New York Times", fillimisht për shkak të ndikimit ekonomik të krizës së madhe ekonomike të viteve 2007–2009. Megjithatë, rënia e vazhdueshme ka habitur demografët, të cilët thonë se ka të ngjarë të ndikojnë faktorë të shumtë shoqërorë dhe ekonomikë.

Normat e lindjeve tek adoleshentet kanë shënuar një nga rëniet më të mëdha, duke rënë me 7 për qind krahasuar me vitin e kaluar dhe më shumë se 70 për qind që nga viti 2007. Ekspertët thonë se kjo pasqyron rritjen e aksesit në arsim dhe kontroll më të mirë të riprodhimit, sipas gazetës.

Në të njëjtën kohë, shkalla e lindshmërisë është rritur tek gratë në të 30-at dhe 40-at e tyre, duke sugjeruar se shumë prej tyre po e shtyjnë lindjen e fëmijëve për më vonë dhe jo domosdoshmërisht po heqin dorë prej saj.

Megjithatë, pasiguria vazhdon. Pothuajse gjysma e grave në SHBA në moshën 30-vjeç tani janë pa fëmijë, krahasuar me 18 për qind në vitet 1970.

Ekspertët kanë paralajmëruar se nivelet vazhdimisht të ulëta të lindshmërisë mund të ushtrojnë presion mbi rritjen ekonomike dhe sistemet sociale ndërsa popullsia plaket, megjithëse trendet e imigracionit do të luajnë gjithashtu një rol kyç në formësimin e demografisë së ardhshme, raportoi "The New York Times".

Imigrantët zakonisht kanë më shumë fëmijë dhe tradicionalisht kanë ndihmuar në mbajtjen më të lartë të shkallës së përgjithshme të lindshmërisë. Masat e administratës së presidentit Donald Trump kundër imigrantëve që tashmë ndodhen në SHBA dhe përpjekjet për të dekurajuar imigracionin nga shumë vende mund të nxisin rënie afatgjatë të lindshmërisë.

Konservatorët amerikanë kanë paralajmëruar për një kolaps demografik dhe kanë bërë thirrje që popullsia vendase joimigrante të ketë më shumë fëmijë.