"Haftar dhe mbështetësit e tij do të bëhen objektiv legjitim nëse sulmojnë njësitë turke"

Ministri turk i Mbrojtjes Kombëtare, Hulusi Akar, së bashku me zyrtarët e lartë ushtarakë, sot vizituan trupat turke të vendosura në Libi, raporton Anadolu Agency (AA).

Akar, i cili vizitoi Komandën e Task-Grupit të Libisë, iu drejtua trupave me një fjalim, duke thënë se Forcat e Armatosura Turke (TSK) kanë kaluar një periudhë të ngarkuar.

Akar tha se forcat e armatosura që kryejnë detyra për sigurinë e 83 milionë njerëzve në Turqi, gjithashtu bëjnë çmos për të kontribuar në sigurinë e të gjitha vendeve mike si Libia, Azerbajxhani dhe Republika Turke e Qipros Veriore (TRNC).

"Problemi kryesor në Libi është lideri i puçit (Khalifa) Haftar dhe mbështetësit e tij dhe këtu buron problemi”, tha ai, duke theksuar se qeveria legjitime në Libi është Qeveria e Pajtimit Kombëtar (GNA) që u formua nën iniciativën e OKB-së.

Duke nënvizuar se Haftar është përgjegjës për gjakderdhjen në Libi, Akar tha: "Vrasësi Haftar dhe mbështetësit e tij do të konsiderohen si objektiva legjitime kudo, nëse sulmohen njësitë turke”.

Libia është shkatërruar nga një luftë civile që nga rrëzimi i sunduesit të ndjerë Muammar Gaddafi në vitin 2011.

GNA u themelua në vitin 2015 nën një marrëveshje të udhëhequr nga OKB-ja, por përpjekjet për një zgjidhje afatgjate dështuan për shkak të një sulmi ushtarak nga forcat besnike të Haftarit. Ai nisi një sulm ndaj kryeqytetit Tripoli në prill të vitit 2019 por më vonë u zmbraps.

Një armëpushim u dakordua në fund të tetorit dhe negociatat për një përbërje të përkohshme para zgjedhjeve presidenciale dhe parlamentare më 24 dhjetor 2021 po vazhdojnë.