Irani fillon prodhimin e pjesëve të centrifugës në centralin bërthamor

Irani njoftoi se ka filluar prodhimin e pjesëve të centrifugës që përdoren për pasurimin e uraniumit në objektin bërthamor në Natanz, transmeton Anadolu Agency (AA).

Në deklaratën në “Nournews”, të lidhur me Këshillin e Lartë të Sigurisë Kombëtare, pajisjet speciale të nevojshme për prodhimin e pjesëve të centrifugës në përputhje me programin e ri të Agjencisë së Energjisë Atomike Iraniane u transferuan nga qyteti Karaj në Qendrën Bërthamore Natanz Martyr Ahmadi Rusen në provincën e Isfahanit.

Pas montimit të pajisjeve të sjella në objekt, nga dje ka nisur procesi i prodhimit të pjesëve të centrifugës në impiantin bërthamor në Natanz.

Duke përmendur procedurat e vëzhgimit ndërmjet Iranit dhe Agjencisë Ndërkombëtare të Energjisë Atomike (IAEA), në deklaratë thuhet se në përputhje me procedurat aktuale, regjistrimet e kamerave të sigurisë në objekt nuk do t'i dorëzohen IAEA-së.

Pas sabotazhit në objektin bërthamor në Karaj, i cili prodhon pjesë të centrifugave të përdorura në pasurimin e uraniumit, më 23 qershor 2021, u dëmtuan edhe sistemet e kamerave, të cilat ishin pjesë e inspektimit ndërkombëtar në objekt. Irani hoqi kamerat në objekt pas sabotimit dhe njoftoi se të dhënat e regjistruara nuk do të ishin të disponueshme për IAEA-në derisa të hiqen plotësisht sanksionet.