Irlanda dhe Malta u bën thirrje për zbatimin e plotë të marrëveshjes në Gaza

Ministrat e Punëve të Jashtme të Irlandës dhe Maltës kanë përsëritur nevojën për zbatimin e plotë të marrëveshjes së armëpushimit në Rripin e Gazës, duke theksuar rëndësinë e zgjidhjes me dy shtete si "objektiv përfundimtar".

Simon Harris, ministri irlandez i Punëve të Jashtme, mbrëmë për Anadolu tha se është e rëndësishme që të gjitha palët në armëpushim të punojnë për ta zbatuar plotësisht atë.

"Mendoj se është disi inkurajuese dhe shpresëdhënëse që ne shohim emrat e pengjeve që do të lirohen”, tha Harris në margjinat e Konferencës së Sigurisë në Mynih, e cila përfundon nesër.

Ai shtoi se është "absolutisht jetike" që të gjitha pengjet të kthehen në familjet e tyre dhe është "absolutisht jetike" që të gjitha pjesët e marrëveshjes së armëpushimit të mbështeten nga të gjithë.

“Ne duhet të arrijmë në një pikë ku të mbajë armëpushimi dhe më pas mund të fillojmë të flasim për rindërtimin, për ndihmën, për qeverisjen dhe sigurinë në Gaza”, tha Harris.

Zv/kryeministri dhe ministri i Punëve të Jashtme i Maltës, Ian Borg, tha se shpresonte të arrinte në një pikë ku do të kishte një armëpushim të përhershëm.

“Ne shpresojmë që palët në marrëveshje të qëndrojnë në atë që kanë rënë dakord dhe të shohim lirimin e pengjeve dhe armëpushimi të vazhdojë. Malta ishte ndër të parat që bëri thirrje për një armëpushim të përhershëm, me objektivin përfundimtar zgjidhjen me dy shtete”, tha Borg për Anadolu.

Numri i palestinezëve të vrarë nga sulmi gjenocidal i Izraelit që nga tetori i vitit 2023 është rritur në të paktën 48.222.

Më 19 janar, marrëveshja e armëpushimit hyri në fuqi në Gaza, duke ndalur luftën gjenocidale të Izraelit që ka vrarë të paktën 48.200 palestinezë, shumica prej tyre gra dhe fëmijë, si dhe e ka lënë enklavën në gërmadha.

Nëntorin e kaluar, Gjykata Penale Ndërkombëtare lëshoi ​​urdhër-arreste ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.

Izraeli për luftën në enklavën palestineze gjithashtu përballet me një çështje gjenocidi në Gjykatën Ndërkombëtare të Drejtësisë.

Lidhur me luftën në Ukrainë, shefi i diplomacisë së Maltës tha se përfundimi i luftës është i rëndësishëm.

“Është e rëndësishme që paqja e arritur të jetë e drejtë dhe e qëndrueshme duke respektuar, natyrisht Ukrainën që u pushtua dhe viktimën në gjithë këtë”, tha Borg.

Komentet e tij vijnë pasi mundësia e bisedimeve për një marrëveshje të paqes është aktuale në Mynih pasi presidenti i SHBA-së, Donald Trump, të mërkurën zhvilloi telefonata të ndara me presidentin rus, Vladimir Putin dhe presidentin ukrainas, Volodymyr Zelenskyy, në një përpjekje për t'i dhënë fund luftës.