Kore e Jugut, partia në pushtet kërkon pezullimin e kompetencave të presidentit

Lideri i partisë në pushtet i Koresë së Jugut, Han Dong-hoon ka deklaruar se presidenti Yoon Suk Yeol duhet të pezullohet menjëherë nga ushtrimi i autoritetit të tij, duke zbuluar se Yoon urdhëroi arrestimin e politikanëve kryesorë gjatë shpalljes së tij të dështuar të ligjit ushtarak, transmeton Anadolu.

Siç raporton "Yonhap News", Han, kreu i Partisë së Pushtetit Popullor (PPP), paralajmëroi se ekziston mundësia që presidenti Yoon mund të ndërmarrë një veprim tjetër të ngjashëm "radikal" me shpalljen e tij të dështuar të ligjit ushtarak nëse ai vazhdon të mbajë pushtetin presidencial.

"Duke marrë parasysh faktet e reja të zbuluara, besoj se është e nevojshme të pezullohet menjëherë presidenti Yoon Suk Yeol nga detyrat e tij për të mbrojtur Republikën e Koresë dhe popullin e saj", tha Han.

Ai theksoi se dje u konfirmua se presidenti Yoon kishte udhëzuar komandantin e kundërzbulimit, Yeo In-hyung, për të arrestuar figurat kryesore politike, duke i etiketuar ata si forca "anti-shtetërore" dhe madje, tha ai, ka përdorur burime të inteligjencës për të kryer arrestimet.

Kreu i partisë në pushtet shprehu shqetësim serioz se "veprime të tilla radikale" mund të përsëriten nëse presidenti Yoon mbetet në detyrë, si dhe paralajmëroi se kjo do ta vendoste vendin në "rrezik të madh".

Vëzhguesit sugjerojnë se Han mund të jetë duke sinjalizuar mbështetjen e tij për një mocion fajësimi të udhëhequr nga opozita kundër presidentit Yoon, i cili do të votohet gjatë një seance plenare gjatë ditës së nesërme.

Më herët, Han u zotua se do të mobilizojë përpjekjet për të bllokuar kalimin e mocionit dhe se PPP-ja është vendosur zyrtarisht ta kundërshtojë atë. PPP-ja është planifikuar të mbajë një mbledhje të përgjithshme urgjente të ligjvënësve të saj sot më vonë, e cila duket se do të diskutojë mocionin e shkarkimit.

Ndërkohë, deputeti Cho Kyoung-tae, një ligjvënës me gjashtë mandate i PPP-së, u bë anëtari i parë i partisë në pushtet që mbështeti publikisht shkarkimin e presidentit Yoon. Për të kaluar mocionin, kërkohet shumicë prej dy të tretave, që do të thotë se do të duhet mbështetja e të paktën tetë ligjvënësve të PPP-së.