Liderët e G7 e cilësojnë si "krim lufte" sulmin e Rusisë në qendrën tregtare në Ukrainë

Pasi një qendër tregtare në qytetin Kremenchuk të Ukrainës u godit nga raketat ruse, liderët e G7-tës bënë një deklaratë të përbashkët ku e dënuan sulmin dhe e cilësuan atë si "krim lufte", transmeton Anadolu Agency (AA).

Ndërkohë që në samitin e G7 në Gjemani u dhanë premtime për mbështetje financiare, humanitare, ushtarake dhe diplomatike për Ukrainën për aq kohë sa të jetë e nevojshme, presidenti i Ukrainës, Volodymyr Zelenskyy njoftoi se forcat ruse goditën qendrën tregtare në qytetin Kremenchuk në të cilën ndodheshin mbi 1.000 civilë.

Liderët e G7 në një deklaratë të përbashkët njoftuan se dënojnë ashpër sulmin e urryer në qendrën tregtare.

"Qëndrojmë pranë Ukrainës për të mbajtur zi për viktimat e pafajshme të këtij sulmi brutal. Sulmet e kryera pa dallim ndaj civilëve të pafajshëm janë krim lufte. Do të kërkohet llogari nga presidenti rus Vladimir Putin dhe përgjegjësit", thuhet në deklaratë.

Duke bërë të ditur se do të vazhdojnë të sigurojnë mbështetje financiare, humanitare dhe ushtarake për Ukrainën, liderët thanë: "Ne nuk do të pushojmë derisa Rusia të përfundojë luftën e saj mizore dhe të pakuptimtë kundër Ukrainës".

Në një deklaratë nga Forcat Ajrore të Ukrainës thuhet se qendra tregtare "Amstor" u godit me raketat "X-22" të lëshuara nga avionët luftarakë "Tu-22M3" nga rajoni Kursk i Rusisë.

Kreu i administratës ushtarake të rajonit Poltava, Dmitriy Lunin tha se vazhdojnë punimet për të shuar zjarrin në qendrën tregtare të goditur. Ai theksoi se si pasojë e sulmit kanë humbur jetën 10 persona ndërsa mbi 40 të tjerë janë plagosur.