"Mbi 200.000 ukrainas janë kthyer nga Evropa për të mbrojtur atdheun"

Ministri i Mbrojtjes i Ukrainës, Oleksii Reznikov, tha se më shumë se 200.000 qytetarë ukrainas janë kthyer nga Evropa për të mbrojtur vendin e tyre, raporton Anadolu Agency (AA).

"Më shumë se 100.000 qytetarë ukrainas iu bashkuan ushtrisë. Më shumë se 200.000 qytetarë tanë u kthyen nga Evropa për të mbrojtur vendin tonë", tha Oleksii Reznikov. "Mes tyre ka edhe vullnetarë të huaj", theksoi ai.

"Ne nuk do ta mposhtim Rusinë në sasi, do ta kapërcejmë atë në cilësi", tha Reznikov.

"Askush në botë nuk besonte se ne do të qëndronim në këmbë, veçanërisht se do të qëndronim kaq gjatë. Ne nuk ndalemi. Përkundrazi, ne sulmojmë tani. Planet e armikut janë prishur. E gjithë bota e sheh këtë". theksoi ai.

Ai tha se ushtria ruse pësoi "humbje të mëdha" dhe për këtë arsye sulmoi shkollat dhe spitalet.

Reznikov shtoi se puna për evakuimin e civilëve përmes korridoreve humanitare vazhdon në kryeqytetin Kiev dhe qytetet Mariupol, Sumy dhe Kharkiv.

Të paktën 549 civilë janë vrarë dhe 957 të tjerë janë plagosur në Ukrainë që nga fillimi i luftës, sipas shifrave të OKB-së.

Më shumë se 2,3 milionë njerëz kanë ikur gjithashtu në vendet fqinje, tha agjencia e OKB-së për refugjatët.