Rabia İclal Turan
04 janar 2025•Përditësim: 05 janar 2025
Departamenti amerikan i Shtetit ka njoftuar “joformalisht” Kongresin për një marrëveshje armësh të propozuar prej 8 miliardë dollarësh me Izraelin, duke përfshirë municione për avionë luftarakë, helikopterë sulmues dhe predha artilerie, sipas një raportimi në median amerikane, transmeton Anadolu.
Departamenti i Shtetit e ka prezantuar marrëveshjen si një masë për të “mbështetur sigurinë afatgjatë të Izraelit duke rifurnizuar stoqet e municioneve kritike dhe aftësitë e mbrojtjes ajrore”, raportoi “Axios”, duke cituar një burim të njohur me këtë çështje.
“Presidenti e ka bërë të qartë se Izraeli ka të drejtë të mbrojë qytetarët e tij, në përputhje me të drejtën ndërkombëtare dhe të drejtën ndërkombëtare humanitare, dhe për të penguar agresionin nga Irani dhe organizatat e tij të deleguara. Ne do të vazhdojmë të ofrojmë aftësitë e nevojshme për mbrojtjen e Izraelit", citohet të ketë thënë një zyrtar amerikan.
Lajmi vjen ndërsa presidenti Joe Biden po i afrohet ditëve të fundit të mandatit të tij përpara inaugurimit të Donald Trumpit më 20 janar.
Shitja e propozuar e armëve, në pritje të miratimit të Kongresit, përfshin raketa ajër-ajër AIM-120C-8 AMRAAM për avionë luftarakë, predha artilerie 155 mm, bomba me diametër të vogël, koka 500 paund, siguresa bombash dhe pajisje të tjera të ngjashme, thuhet në lajm.
Raportohet se në shitje do të përfshihen edhe municione të dorëzuara nga rezervat aktuale të SHBA-së, ndërsa për shumicën do të duhen një ose më shumë vjet për t’u prodhuar dhe dorëzuar.
Departamenti i Shtetit nuk iu përgjigj menjëherë kërkesës së Anadolus për koment.
SHBA-ja përballet me kritika për ofrimin e ndihmës ushtarake për Izraelin, pasi më shumë se 45.650 palestinezë, kryesisht gra dhe fëmijë, janë vrarë në sulmet izraelite në Rripin e Gazës që nga 7 tetori 2023.
Disa grupe të të drejtave të njeriut, ish-zyrtarë të Departamentit të Shtetit dhe ligjvënës demokratë i kanë kërkuar administratës Biden të ndalojë transferimet e armëve drejt Izraelit, duke përmendur shkelje të ligjeve të SHBA-së, duke përfshirë “Ligjin Leahy”, si dhe ligjet ndërkombëtare dhe të drejtat e njeriut. Izraeli i mohon këto akuza.
Ligji Leahy, i emëruar sipas ish-senatorit Patrick Leahy, kërkon që SHBA-ja të ndalojë ndihmën ushtarake ndaj një ushtrie të huaj ose njësitë e zbatimit të ligjit nëse ka prova të besueshme për shkelje të të drejtave të njeriut.
Biden ndaloi dërgesat e 1.800 bombave 2.000 paund dhe 1.700 bombave 500 paund në Izrael në maj për shkak të ofensivës së tij në qytetin jugor të Gazës, Rafah, duke përmendur viktimat civile në enklavë si pasojë e bombave. Në korrik, ai vendosi të vazhdojë me dërgimin e bombave 500 paund në Izrael pas një pauze dymujore.
Megjithatë, fluksi i pajisjeve të tjera ushtarake në Izrael vazhdoi, duke përfshirë 20 miliardë dollarë avionë luftarakë dhe furnizime të tjera ushtarake që u miratuan nga Departamenti i Shtetit në gusht.
SHBA-ja, e cila ofron 3,8 miliardë dollarë ndihmë vjetore të sigurisë për Izraelin, është deri tani furnizuesi më i madh i armëve për Tel Avivin, me më shumë se 70 për qind të importeve të armëve të Izraelit që vijnë nga SHBA-ja, sipas Institutit Ndërkombëtar Kërkimor të Paqes në Stokholm.
Armët e prodhuara nga SHBA-ja janë dokumentuar në disa sulme izraelite në Gaza që kanë rezultuar në viktima civile, megjithëse autoritetet amerikane nuk kanë pranuar të konfirmojnë këtë fakt.
Një raport i Departamentit të Shtetit në maj tha se është “e arsyeshme të vlerësohet” se Izraeli përdori armë të prodhuara nga SHBA-ja në mënyra që nuk janë në përputhje me të drejtën ndërkombëtare humanitare. Raporti nuk arriti në një përfundim final, duke thënë se nuk ka “informacion të plotë”.
