"Milicët e Haftarit shkelën armëpushimin për herë të dytë"

Ushtria e Libisë njoftoi se milicët e Khalifa Haftarit, liderit të forcave jolegjitime në lindje të vendit kanë shkelur armëpushimin duke sulmuar me 6 raketa "Grad" njësitë e ushtrisë në perëndim të qytetit Sirte, transmeton Anadolu Agency (AA).

Zëdhënësi i ushtrisë së Libisë, Mohamed Qanunu, në një deklaratë nga llogaria e tij në rrjetin social tha se "Forcat tona në ora 00.06 sipas kohës lokale përcaktuan edhe një shkelje tjetër të armëpushimit të pritur. Kjo është shkelja e dytë që bëhet në një periudhë më të shkurtër se 72 orë".

Duke informuar se milicët e Haftarit kanë sulmuar me 6 raketa "Grad" njësitë e ushtrisë në perëndim të Sirtes, Qanunu vuri në dukje se njësitë e ushtrisë janë në përgatitje të plotë dhe se do të jipet përgjigja e nevojshme në kohën dhe vendin e duhur.

Vendimi për armëpushim në Libi

Kryeministri i Libisë, Fayez al-Sarraj dhe kreu i Parlamentit të Tobrukut, Aguila Saleh, aleati politik i Haftarit, liderit të forcave jolegjitime në lindje të Libisë, njoftuan më 21 gusht vendimin e marrë për armëpushim.

Në kuadër të armëpushimit, parashikohet që Sirte dhe Al-Jufra të jenë zona të demilitarizuara, të rifillojë prodhimi dhe eksportimi i naftës në vend, të largohen ushtarët mercenarë dhe të huaj nga vendi si dhe në marsin e ardhshëm të mbahen zgjedhjet e përgjithshme dhe të Këshillit presidencial.