"PKK synon të destabilizojë Turqinë dhe Irakun"

Organizata terroriste PKK synon të destabilizojë Turqinë dhe Irakun, deklaroi një zyrtare irakiane të enjten, raporton Anadolu Agency (AA).

Duke folur për AA, Lilyen Muhammad, deputetja e Mosulit e partisë Fronti Turkmen i Irakut (FTI), potencoi praninë e PKK-së në Mosul dhe Sinxhar në veri të Irakut, gjë që kërcënon sovranitetin e Irakut.

Ajo theksoi se prania e grupit terrorist në rajon e detyron Turqinë të kryejë operacione ndërkufitare për hir të sigurisë dhe stabilitetit të kufirit.

Duke theksuar rëndësinë e kërcënimit të paraqitur nga PKK, Muhammad tha se Turqia dhe Iraku, si vende fqinje, duhet të bashkëpunojnë në fushën e sigurisë për t'i dhënë fund pranisë së grupit terrorist në veri të Irakut.

Në fushatën e saj terroriste më shumë se 35-vjeçare kundër Turqisë, PKK e listuar si organizatë terroriste nga Turqia, SHBA-ja dhe BE-ja, ka qenë përgjegjëse për vdekjen e të paktën 40 mijë personave, përfshirë gra, fëmijë dhe foshnja.

Organizata terroriste shpesh fshihet në veri të Irakut, përtej kufirit jugor të Turqisë, për të komplotuar sulme terroriste në Turqi.