Ekip
10 Tetor 2020•Përditësim: 11 Tetor 2020
Policia në qytetin e lindjes së largët të Rusisë, Khabarovsk, sot arrestoi disa dhjetëra protestues, që është përpjekja e parë e tillë ndaj protestuesve që nga fillimi i tubimeve kundër arrestimit të guvernatorit të provincës të cilat filluan tre muaj më parë, tranmseton Anadolu Agency (AA).
Banorët e qytetit rus Khabarovsk vazhduan të protestojnë kundër arrestimit të guvernatorit të tyre të preferuar, Sergei Furgal, dhe kërkojnë dorëheqjen e guvernatorit në detyrë të caktuar nga Kremlini.
Guvernatori Furgal u arrestua më 9 korrik nën dyshimet për përfshirje në një vrasje dhe u dërgua në burg në Moskë. Furgal, ish-biznesmen, ka mohuar akuzat për të cilat mbështetësit e tij thonë se janë hakmarrje e rivalëve të tij.
Që nga arrestimi i tij, mijëra protestues janë mbledhur rregullisht në Khabarovsk, një qytet me 600.000 banorë afër kufirit me Kinën. Pjesëmarrja më e lartë ishte gjatë fundjavës.
Policia fillimisht nuk ndërhyri kur mijëra demonstrues marshuan nëpër qytet, por më vonë u arrestuan rreth 30 protestues kur vendosën tenda në sheshin qendror në Khabarovsk.
