Fatih Erel
22 Nëntor 2016•Përditësim: 22 Nëntor 2016
MONT PELERIN (AA) – Kanë përfunduar pa zgjidhje bisedimet paqësore për Qipron të ndërmjetësuara nga Organizata e Kombeve të Bashkuara (OKB), pasi palët nuk arritën marrëveshje për zgjidhje të problemit, raporton Anadolu Agency (AA).
Lideri qipriot grek, Nicos Anastasiades, dhe lideri qipriot turk, Mustafa Akinci të dielën dhe të hënën kanë qenë të përfshirë në negociata intensive për ti dhënë fund mosmarrëveshjeve disa dekadashe.
"Me gjithë përpjekjet e tyre të mira, ata nuk kanë qenë në gjendje të afrojnë qëndrimet e nevojshme mbi kriteret për rregullimin territorial që do të hap rrugën për fazën e fundit të bisedimeve", thuhet në njoftimin e OKB-së në të cilin sqarohet se palët janë kthyer në Qipro.
Pala turke e Qipros, fajin për dështimin e bisedimeve e ka hedhur te ajo greke të cilën e ka akuzuar për qasje të pakompromist.
“Pala turke e Qipros nuk ka parë qëllime të mira te pala greke”, deklaroi zëdhënësi presidencial i turqve qipriot Baris Burcu, në konferencën për mediat pas dështimit të bisedimeve.
Përkundër besimit se dy burrështetasit janë shumë pranë aritjes së një marrëveshjeje mbi territorin i cili do të administrohej nga qeveria turke qipriote, mbetën mosmarrëveshje se cilat qytete dhe fshatra duhet të përfshihen.
Secila marrëveshje eventuale do të thotë rirregullimin e kufijve ekzistues dhe potencialisht lëvizjen e mijëra banorëve nga shtëpitë e tyre, 42 vjet pas zhvendosjes së parë si pasojë e ndarjes së ishullit.
Burcu tha se oferta e qipriotëve turq për rregullimin territorial ishte që ata të kenë 29.2 përqind të ishullit, për të shtuar se oferta është refuzuar nga pala tjetër.
Në qoftë se arrihet një marrëveshje eventuale për ndryshimet territoriale, atëherë pritet që negociatorët të njoftojnë një datë për takimin përfundimtar mes liderëve qipriotë turq dhe grekë si dhe të tre shteteve tjera të përfshira në proces: Turqia, Greqia dhe Britania e Madhe.
