Rregullatori evropian i barnave nis vlerësimin e ilaçit kundër COVID-19

Agjencia Evropiane e Barnave (EMA), rregullatori i barnave në Bashkimin Evropian (BE), ka filluar të vlerësojë aplikimin për hedhjen në treg të ilaçit të prodhuar nga kompania GlaxoSmithKline për trajtimin e koronavirusit (COVID-19), transmeton Anadolu Agency (AA).

Sipas një deklarate nga EMA, kompania ka aplikuar për aprovim të tregut në BE për antitrupin monoklonal “Xevudy” që përmban sotrovimab.

Siç njoftohet, procesi i vlerësimit ka nisur dhe rezultati pritet të dalë në një kohë relativisht të shkurtër, pasi vlerësimi paraprak është bërë më parë.

Medikamenti është zhvilluar për përdorim tek të rriturit dhe adoleshentët në rastet kur ekziston rreziku i përkeqësimit të sëmundjes COVID-19.

Nëse EMA konsideron se përfitimet e ilaçit tejkalojnë rreziqet, ajo do të këshillojë për miratim tregu Komisionin e BE-së, i cili do të japë aprovimin përfundimtar.