SHBA, "brenda ditëve" Pfizer pret miratimin e vaksinës kundër COVID-19

Prodhuesi i ilaçeve amerikane Pfizer dhe kompania gjermane e bioteknologjisë BioNTech ka bërë të ditur se kandidati i tyre i vaksinës "plotësoi të gjitha pikat përfundimtare të efikasitetit të studimit" dhe se është i gatshëm që "brenda ditëve" të kërkojë miratimin nga Administrata e Barnave dhe Ushqimit të SHBA-ve (FDA), transmeton Anadolu Agency (AA).

Njoftimi shënoi setin e parë të rezultateve të plota nga një provë e vaksinës në 'fazën 3', përderisa koronavirusi i ri (COVID-19) është konfirmuar në mbi 56 milionë persona në mbarë botën.

Dy kompanitë njoftuan se analiza përfundimtare e efikasitetit tregoi se vaksina ishte 95 për qind efektive kundër COVID-19, duke filluar 28 ditë pas dozës së parë.

FDA kërkon të dhëna përcjellëse dy-mujore për të paktën gjysmën e pjesëmarrësve në provën e fazës së fundit të vaksinës para se të kërkojë autorizimin e përdorimit emergjent të një vaksine mes shpërthimit.

Përderisa nuk u vërejtën shqetësime serioze të sigurisë, analiza tregoi se efekti anësor më i rëndësishëm ishte lodhja në një frekuencë prej 3.8 për qind dhe dhimbja e kokës në 2 për qind.

Analiza u bazua në 170 raste të konfirmuara. Po ashtu në provë ishin dhjetë raste të rënda.

Analiza po ashtu tregoi mbi 94 për qind efikasitet tek të rritur më të moshuar se 65-vjeç, të cilët janë më të prekurit ndaj pandemisë.

"Rezultatet e studimit shënojnë një hap të rëndësishëm në këtë udhëtim historik tetë-mujor për të sjellë një vaksinë të aftë për të ndihmuar në përfundimin e kësaj pandemie shkatërruese. Ne vazhdojmë të lëvizim me shpejtësinë e shkencës për të përpiluar të gjitha të dhënat e mbledhura deri më tani dhe për t'i ndarë ato me rregullatorët nëpër botë", tha dr. Albert Bourla, shef ekzekutiv i kompanisë Pfizer.

Dr. Uğur Şahin, shef ekzekutiv dhe bashkë-themelues i kompanisë BioNTech, theksoi se kandidati i vaksinës ofron mbrojtje të hershme.

"Ne jemi mirënjohës që prova e parë globale që arriti analizën përfundimtare të efikasitetit tregon se një shkallë e lartë e mbrojtjes kundër COVID-19 mund të arrihet shumë shpejt pas dozës së parë 30 (mikrogramëshe)", tha Şahin.

Dy kompanitë presin të prodhojnë deri në 50 milionë doza në vitin 2020 dhe deri në 1.3 miliardë doza deri në fund të vitit 2021.

Prova e 'fazës 3' filloi më 27 korrik në 43.661 pjesëmarrës global, 41.135 prej të cilëve morën dozën e dytë më 8 nëntor.