SHBA-ja konfirmon arritjen e 31 tankeve Abrams në Gjermani për trajnimin e forcave ukrainase

Departamenti amerikan i Mbrojtjes njoftoi se 31 tanke trajnuese "M1 Abrams" kanë mbërritur në Gjermani përpara trajnimit të forcave ukrainase nën udhëheqjen e SHBA-së, raporton Anadolu.

"Unë mund të konfirmoj se 31 tanke trajnuese ‘M1 Abrams’ kanë mbërritur në Grafenwoehr të Gjermanisë në përgatitje për trajnimin e mëvonshëm të tankistëve ukrainas", u tha gazetarëve zëdhënësi i Pentagonit Patrick Ryder gjatë një konference të përditshme për shtyp.

"Siç kemi diskutuar më parë, ky program i gjerë trajnimi për ekuipazhet dhe mirëmbajtësit ukrainas ka për qëllim t’i përgatisë ata për rolet e tyre kritike përpara në funksionimin efektiv të tankut M1 dhe mbrojtjen e popullit ukrainas", shtoi ai.

Në janar, presidenti Joe Biden njoftoi se SHBA-ja do t’i siguronte Ukrainës 31 tanke "M1 Abrams" në luftën e saj kundër Rusisë. Njoftimi kishte ardhur pasi Gjermania kishte rënë dakord të dërgonte tanket e saj "Leopard 2".

Ryder tha se aspekti kryesor i trajnimit do të jetë mirëmbajtja e tankeve, pasi "M1 Abrams" kërkojnë "shumë mirëmbajtje" në mënyrë që të operojë në mënyrë të duhur.

Ai shtoi se 31 tanket që tani janë në Gjermani nuk janë të njëjtat me ato që ukrainasit do t’i marrin përfundimisht për betejë.

"Ata nuk kanë domosdoshmërisht aftësitë që do t’u duheshin për të luftuar", tha Ryder.