SHBA konfirmon urdhrin për mbylljen e konsullatës së Kinës

Departamenti amerikan i Shtetit sot ka urdhëruar që Kina të mbyllë konsullatën e saj në Houston në shtetin e Teksasit, transmeton Anadolu Agency (AA).

Zëdhënësja e Departamentit, Morgan Ortagus në një deklaratë tha se vendimi është marrë "me qëllim të mbrojtjes së pronësisë intelektuale amerikane dhe informacionit privat të Amerikës", raportoi CNBC.

Duke rikujtuar kërkesat e Konventës së Vjenës për diplomatët që ata "duhet të respektojnë ligjet dhe rregulloret e shtetit pritës" dhe "të kenë detyrë të mos ndërhyjnë në punët e brendshme të atij shteti", Ortagus nënvizoi se Washingtoni nuk do të tolerojë Pekinin.

"SHBA-të nuk do të tolerojnë shkeljet e Republikës Popullore të Kinës (RPK) të sovranitetit tonë dhe frikësimit të popullit tonë, ashtu si nuk kemi toleruar praktikat e padrejta të tregtisë së RPK-së, vjedhjen e vendeve amerikane të punës dhe sjelljet tjera të egra", shtoi ajo .

Kina nuk humbi kohë për të sulmuar hapin e SHBA-ve.

Duke akuzuar SHBA-të për "provokim të njëanshëm politik", zëdhënësi i Ministrisë së Jashtme kineze, Wang Wenbin tha se shtyrja e SHBA-ve për të mbyllur konsullatën e Houstonit është "shkelje e rëndë e ligjit ndërkombëtar dhe normave themelore që rregullojnë marrëdhëniet ndërkombëtare", raportoi e përditshmja kineze Global Times.

Duke i kërkuar Washingtonit "të korrigjojë menjëherë gabimet e tij", Wenbin në një konferencë për media në Pekin tha se: "Përndryshe, Kina do të bëjë përgjigje të ligjshme dhe të nevojshme".