Shtëpia e Bardhë: Biden autorizon rivendosjen e forcave amerikane në Somali

Presidenti Joe Biden ka riautorizuar dislokimin e forcave amerikane në Somali, njoftoi Shtëpia e Bardhë të hënën në një ndryshim të madh politik të kryer me kërkesë të Pentagonit, raporton Anadolu Agency (AA).

Ish-presidenti i SHBA-së, Donald Trump, tërhoqi afërsisht 700 trupa amerikane nga vendi i Afrikës Lindore gjatë muajit të fundit të presidencës së tij, por al-Shabaab, një organizatë e futur në listën e grupeve terroriste nga SHBA-ja, është rritur ndjeshëm në këtë kohë, ku së fundmi mori përsipër sulmin ndaj Bazës së Bashkimit Afrikan në fillim të majit ku u vranë disa trupa.

Zëdhënësja e Shtëpisë së Bardhë, Karine Jean-Pierre, tha se Sekretari i Mbrojtjes Lloyd Austin kërkoi rivendosjen "për të mundësuar një luftë më efektive kundër al-Shabaab-it, e cila është rritur në fuqi dhe paraqet një kërcënim të shtuar". Ajo pranoi rrezikun e natyrshëm të dislokimit, por tha se është "i menaxhueshëm".

Trupat që do të dërgohen në Somali do të vijnë nga dislokimet aktuale në rajon dhe do të kenë kryer ato që Shtëpia e Bardhë i quajti misione "episodike" në vend pas tërheqjes së Trump-it në janar 2021.

"Sot në Somali ne përballemi me degën më të madhe dhe më të pasur globale të Al-Kaedës dhe që ka një strehë të konsiderueshme territoriale të sigurt", tha Jean-Pierre, duke iu referuar al-Shabaab-it.

"Vendimi për të rifutur një prani të vogël por të vazhdueshme u mor para së gjithash për të maksimizuar sigurinë dhe efektivitetin e forcës sonë dhe për t'u mundësuar atyre të ofrojnë mbështetje më të mirë për partnerët tanë. Për më tepër, partnerët tanë mund të përfitojnë nga mbështetja dhe angazhimi ynë më i qëndrueshëm në adresimin e kërcënimit të paraqitur nga al-Shabaab”, shtoi ajo.

Shtëpia e Bardhë nuk specifikoi numrin total të trupave që do të dërgohen në vend.