Udhëheqësit e BE-së u japin Ukrainës dhe Moldavisë statusin kandidat

Udhëheqësit e Bashkimit Evropian (BE) i dhanë sot statusin e kandidatit Ukrainës, hap historik që hap rrugën për anëtarësimin evropian të vendit të shkatërruar nga lufta, transmeton Anadolu Agency (AA).

Udhëheqësit e BE-së në takimin në Bruksel miratuan gjithashtu statusin e kandidatit të Moldavisë dhe njoftuan se Gjeorgjia është në radhë pasi të përmbushë disa kushte.

Presidenti i Këshillit Evropian Charles Michel përshëndeti “momentin historik” në një postim në Twitter duke uruar presidentin ukrainas Volodymyr Zelenskyy dhe presidenten e Moldavisë Maia Sandu.

“Sot është një hap vendimtar në rrugën tuaj drejt BE-së...E ardhmja jonë është së bashku”, tha Michel.

Ursula von der Leyen, presidente e Komisionit të BE-së, tha se kjo është “një ditë e mirë për Evropën”.

“Vendet tuaja janë pjesë e familjes sonë evropiane. Dhe vendimi i sotëm historik i liderëve e konfirmon këtë”, tha ajo në Twitter.

“Ky vendim na forcon të gjithëve. Ajo forcon Ukrainën, Moldavinë dhe Gjeorgjinë përballë imperializmit rus. Dhe forcon BE-në. Sepse i tregon edhe një herë botës se ne jemi të bashkuar dhe të fortë përballë kërcënimeve të jashtme”, shtoi von der Leyen.

Von der Leyen tha se Ukraina, Moldavia dhe Gjeorgjia “të gjitha kanë punë për të bërë përpara se të kalojnë në fazën tjetër të procesit”.

“E di që ata do të lëvizin me shpejtësi. Ata e dinë se sa vendimtare është kjo për demokracitë e tyre, ekonomitë dhe qytetarët e tyre,” shtoi ajo.

Ndërkaq, Zelenskyy tha se vendimi i sotëm shënon një “moment unik dhe historik” në marrëdhëniet Ukrainë-BE.

Në një postim në Twitter, ai falënderoi liderët e BE-së dhe tha se është mirënjohës për mbështetjen e tyre.

“E ardhmja e Ukrainës është brenda BE-së”, tha ai.