"Ukraina dhe BE-ja nuk kanë qenë kurrë më afër"

Ukraina dhe Bashkimi Evropian nuk kanë qenë kurrë më afër, tha sot presidentja e Komisionit Evropian, Ursula von der Leyen, transmeton Anadolu Agency (AA).

Duke iu drejtuar Forumit të 8-të të Kohezionit në një video-mesazh, Von der Leyen siguroi popullin ukrainas se BE-ja do të vazhdojë të mbështesë vendin dhe të mirëpresë refugjatët pasi "ata janë pjesë e familjes evropiane".

"Ukraina dhe BE-ja nuk kanë qenë kurrë më afër", tha ajo duke theksuar se imazhet e evropianëve që mirëpresin refugjatët ukrainas "tregojnë shpresë" pranë skenave "shkatërruese" të luftës.

Von der Leyen theksoi se KE-ja prezantoi javën e kaluar një paketë që u lejon vendeve anëtare të BE-së të përdorin fondet e kohezionit për të "mirëpritur refugjatët ukrainas shpejt dhe në mënyrë njerëzore", duke ngritur qendra pritjeje, spitale të lëvizshme dhe duke ofruar arsim, trajnim gjuhësor dhe mbështetje për punësim.

BE-ja mirëpret shumicën e 3.2 milionë ukrainasve që u larguan nga vendi që kur Rusia filloi luftën kundër Ukrainës më 24 shkurt.

Sipas OKB-së, mbi 1.97 milionë ukrainas ikën në Poloni, 509 mijë në Rumani, 291 mijë në Hungari dhe 235 mijë në Sllovaki.

BE-ja vendosi të dërgojë 500 milionë euro (550 milionë dollarë) ndihmë humanitare në Ukrainë dhe miratoi katër paketa sanksionesh që nga fillimi i krizës.

Masat përfshijnë ndalimin e eksportit të mallrave luksoze në Rusi, duke synuar presidentin rus Vladimir Putin, kryediplomatin Sergej Lavrov, oligarkët dhe oficerët ushtarakë si dhe përjashtimin e bankave ruse dhe bjelloruse nga sistemi bankar ndërkombëtar SWIFT dhe ndalimin e transmetimit të mediave Sputnik dhe RT.