Ushtria e Lirë Siriane, e mbështetur nga SHBA, përparon në periferinë e Homsit

Ushtria e Lirë Siriane e mbështetur nga SHBA bëri përparime të mëtejshme periferinë lindore të Homsit, me raporte për përleshje të vazhdueshme me forcat e regjimit të Bashar Asadit në Palmyra, në Sirinë qendrore, raporton Anadolu.

Sipas burimeve lokale, Ushtria e Lirë Siriane, e cila vepron në rajonin Al-Tanf në zonën kufitare midis Sirisë, Irakut dhe Jordanisë, ka bërë përparime të rëndësishme kundër forcave të regjimit në periferinë lindore të Homsit.

Grupi opozitar aktualisht po lufton forcat e regjimit në jug të qytetit Palmyra.

SHBA po ofron mbështetje logjistike për grupin gjatë ofensivës së tij kundër forcave të regjimit.

Ushtria e Lirë Siriane vepron si një entitet i veçantë nga grupet opozitare, e njohur tani si Ushtria Kombëtare Siriane, e cila u formua pas kryengritjeve publike në Siri.

- Zhvillimet në Siri

Përleshjet midis forcave të regjimit sirian dhe grupeve kundër regjimit shpërthyen më 27 nëntor në periferinë perëndimore të Halepit.

Deri më 30 nëntor, forcat opozitare kishin marrë kontrollin e pjesës më të madhe të qendrës së qytetit të Halepit dhe kishin vendosur dominimin në të gjithë provincën e Idlibit.

Më një dhjetor, Ushtria Kombëtare Siriane nisi operacionin "Agimi i Lirisë" kundër grupit terrorist PKK/YPG në fshatin Tel Rifaat të Halepit, duke çliruar zonën nga elementët terroristë.

Forcat kundër regjimit dje pushtuan qytetin Hana dhe vazhduan përparimin e tyre sot, duke pushtuar distriktet Rastan dhe Talbiseh në provincën Homs.