Zehra Ulucak
27 Nëntor 2018•Përditësim: 27 Nëntor 2018
PARADISE (AA) - Vazhdon të rritet numri i viktimave si pasojë e zjarreve në Kaliforni të SHBA-ve, të cilat shpërthyen që nga 8 nëntori, por që u vunë nën kontroll mëngjesin e së dielës, transmeton Anadolu Agency (AA).
Sherifi i rajonit Butte, Kory Honea, tha se pas shuarjes së plotë të zjarreve pyjore të quajtura "Kampet e zjarrit" me gjetjen edhe të 3 trupave numri i personave që kanë humbur jetën ka arritur në 88.
Honea bëri të ditur se ende 203 persona llogariten të zhdukur.
Sekretari amerikan i Punëve të Brendshme, Ryan Zinke, pas vizitës së realizuar në rajonin Paradise, në veri të shtetit federal ku zjarri ka qenë efektiv, tha se më parë nuk ka qenë dëshmitar i një rrënimi të tillë dhe shtoi se kostoja e zjarrit pyjor mund të arrijë deri në miliarda dollarë.
Më shumë se 20 milionë dollarë ndihmë për viktimat e zjarreve
Një zyrtar nga Instituti Federal i Menaxhimit të Rasteve Emergjente (FEMA) tha se administrata e SHBA-ve ka ofruar ndihmë prej më shumë se 20 milionë dollarësh për personat që janë detyruar të zhvendosen nga vendet e tyre për shkak të zjarreve në veri të Kalifornisë.
Zëdhënësi i FEMA-s, Frank Mansell në një deklaratë për AP tha se 15,5 milionë dollarë janë shpenzuar për ndihma për strehim dhe banim.
Mansell po ashtu bëri të ditur se janë shpërndarë 5 milionë dollarë për nevojat tjera, përfshirë shpenzimet e varrimit.
Si pasojë e zjarrit që shpërtheu më 8 nëntor në rajonin Paradise në veri të Kalifornisë janë shkatërruar rreth 14 mijë shtëpi, 514 biznese dhe rreth 4.265 ndërtesa.
Zjarri i cili përfshiu rreth 620 kilometra katrorë arriti sipërfaqen e Çikagos. Kampet e zjarrit janë regjistruar në historinë e Kalifornisë si "zjarret më të mëdha pyjore dhe zjarret ku janë regjistruar më shumë viktima në njerëz".
Në pjesën jugore, si pasojë e zjarreve janë djegur shumë vila të personaliteteve të njohura nga bota e filmit, siç janë Scott Baio, Gerard Butler, Miley Cyrus, Guillermo del Toro, Kim Kardashian, Alyssa Milano dhe Rainn Wilson.
