Ekip
31 Mars 2022•Përditësim: 31 Mars 2022
Qeveria e Zvicrës njoftoi se masat e fundit të mbetura të shëndetit publik për COVID-19 do të hiqen nga e premtja, përfshirë mbajtjen e detyrueshme të maskave në transportin publik, raporton Anadolu Agency (AA).
“Vlerësimi i situatës është pozitiv. Infeksionet janë në rënie në të gjitha kategoritë e moshave. Situata në kujdesin intensive është e qëndrueshme, mbingarkesa e kapaciteteve spitalore duket e pamundur”, u tha gazetarëve në Bern, ministri i Brendshëm i Zvicrës, Alain Berset.
“Ata që ende dëshirojnë të mbajnë një maskë duhet të lejohen ta bëjnë këtë. Duhet të kemi tolerancë dhe respekt”, tha ai.
Qeveria kishte hequr shumë kufizime më 16 shkurt ndërsa numri i personave të vaksinuar nuk ka lëvizur dhe numri i rasteve nuk është zvogëluar në mënyrë drastike.
Të mërkurën, 16.462 raste të reja me COVID-19 u raportuan në Zvicër, me një rënie prej 37 për qind gjatë javës së kaluar.
Rreth 165 persona u pranuan në spitale. Pacientët me COVID-19 përbënin 17.4 për qind të shtuarve në kujdesin intensiv ndërsa u raportua për 8 pacientë të vdekur.
Shkalla e vaksinimit në vend pothuajse nuk ka ndryshuar që nga korriku, me vetëm 70.13 për qind të popullsisë prej rreth 8.7 milionë banorësh që kanë marrë një gjilpërë dhe 69.12 për qind janë vaksinuar plotësisht.
“Nuk mund të themi se kriza ka mbaruar, por me siguri mund të themi se faza akute e krizës ka mbaruar”, tha Berset.
Që nga fillimi i pandemisë, 3.48 milionë njerëz ose 41 për qind e popullsisë kanë rezultuar pozitivë ndaj COVID-19, ndërsa rreth 13 mijë persona kanë humbur jetën.
