Banka Qendrore e Turqisë nuk bëri ndryshime në normën e interesit

Banka Qendrore e Turqisë mbajti të pandryshuar normën e saj të huave njëjavore në 14 për qind, në përputhje me parashikimet e tregut, raporton Anadolu Agency (AA).

"Rritja e inflacionit në periudhën e fundit është nxitur nga sjelljet e çrregulluara të çmimeve për shkak të formimeve jo rregullta të çmimeve në tregun valutor, faktorëve të ofertës si rritja e çmimeve globale të ushqimeve dhe mallrave bujqësore, kufizimet e ofertës dhe zhvillimet e kërkesës", njoftoi banka në një deklaratë pas takimit të parë të Komitetit të Politikës Monetare këtë vit.

Komiteti pret që procesi i de-inflacionit të fillojë në vazhdën e masave të marra për çmime të qëndrueshme dhe stabilitet financiar, së bashku me "uljen e inflacionit për shkak të efektit bazë".

Të gjithë ekonomistët e anketuar nga AA të premten parashikuan se norma e politikës do të mbahej konstante në 14 për qind.

Institucionet e huaja financiare parashikuan gjithashtu që banka do të mbajë të qëndrueshme normat e interesit.

Societe Generale nuk priste asnjë ndryshim në normën e interesit, ndërsa Unicredit kishte parashikuar se banka do të shmangte një vendim që do të shkaktonte zhvlerësimin e lirës turke, duke mbajtur normën bazë në 14 për qind.

Banka e Amerikës gjithashtu priste politikë konstante të normën deri në fund të tremujorit të parë.

Më herët, ministri i Thesarit dhe i Financave, Nureddin Nebati, tha se inflacioni do të arrijë kulmin në janar, por se do të ketë një rënie që nga maji për shkak të zhvillimeve në botë dhe rënies së çmimeve të ushqimeve dhe energjisë.

Turqia shënoi një rritje vjetore prej 36 për qind të çmimeve të konsumit në vitin 2021, niveli më i lartë në 19 vjet.

Në mbledhjen e saj të fundit më 16 dhjetor, Banka Qendrore uli normën bazë të huave njëjavore me 100 pikë bazë nga 15 në 14 për qind, në përputhje me pritjet e tregut, që do të thotë se që nga shtatori 2021, norma bazë ishte ulur me 500 pikë bazë.