Sirianët e kthyer në Jarabulus mirënjohës ndaj Turqisë

GAZIANTEP/HALEP (AA) - Sirianët të cilët po përjetojnë lumturinë e kthimit në Jarabulus, vendbanimin e tyre që u pastrua nga grupet terroriste me operacionin "Mburoja e Eufratit", shprehin mirënjohje ndaj Turqisë, raporton Anadolu Agency (AA).

Pastrimi i plotë i Jarabulusit nga elementët e DAESH-it në ditën e 16-të të operacionit ka kthyer buzëqeshjen në fytyrat e sirianëve që jetonin në qytetin Gaziantep të Turqisë. Në saj të operacionit dhjetëra gra, fëmijë dhe të moshuar janë çmallur me atdheun e tyre pas kthimit në shtëpitë e tyre.

Sirianët të cilët shprehin mirënjohje ndaj Turqisë për mikpritjen e treguar ndaj tyre, gjithashtu shpresojnë që në vendin e tyre të vendoset sa më parë paqja e përhershme.

- "Faleminderit Turqi" -

Xhemal Turki i cili ka ardhur në qytetin Gaziantep në vitin 2013 në një deklaratë për gazetarin e AA-së the se gjatë kohës që ka qëndruar në Turqi ka siguruar jetesën për familjen e tij duke punuar në punë të ndryshme.

Ai tha se babanë e ka humbur gjatë konfliktit të brendshëm dhe u shpreh se me ardhjen e paqes në Jarabulus ka vendosur të kthehet në vendin e tij duke marrë nënën dhe të afërmit e tjerë.

Në vazhdim ai tregoi se në Turqi erdhën në gjendje të rëndë duke patur mundësi të jetojnë vetëm në saj të mundësive të ofruara nga populli dhe shteti turk.

"Faleminderit Turqi, qetësove atdheun tonë, ndale luftën. Falënderojmë Turqinë për çdo gjë. Ne po kthehemi në atdhe. A është e mundur të mos jemi të lumtur?. Si për çdo njeri edhe për ne është një tjetër gjë kthimi në atdhe. Faleminderit dhe Allahu e bekoftë Turqinë që na ka ndihmuar shumë, dhe ne tani po çmallemi me atdheun. Allahu qoftë i kënaqur me të gjithë", tha siriani Turki.

- Një prej fëmijëve lindi në Turqi -

Hazune Ali tha se në qytetin Gaziantep kanë ardhur dy vite më parë dhe bashkëshorti i saj ka dhënë kontribut për rezistencën në Siri.

Ajo potencoi se gjatë periudhës që kanë qëndruar në Turqi kanë jetuar me ndihmat e popullit dhe të shtetit. Ali tha se nuk do ta harrojë kurrë humanizmin dhe mikpritjen që ka patur në Turqi.

Më tej Ali tha se në Gaziantep ku erdhi me tre fëmijë, 5 muaj më parë ka lindur edhe një fëmijë tjetër djalë të cilin e ka quajtur Muhammet.

"Atë që nuk e pamë në vendin tonë e pamë në Turqi. I jemi mirënjohës", tha Hazune Ali duke shprehur falënderime për Turqinë.