Prishtinë, mbahet mbrëmje japoneze me muzikë e vallëzim popullor

Nën organizimin e Ambasadës së Japonisë në Kosovë është mbajtur mbrëmje japoneze në Prishtinë, raporton Anadolu Agency (AA).

Tingujt e instrumentit japonez Koto me të cilin u interpretuan disa këngë folklorike të shoqëruara me pjesë vallëzimi japonez, mblodhën mysafirë të shumtë në amfiteatrin e Universitetit të Prishtinës.

Artistja Atsuko Suetomi interpretoi melodi të ndryshme në instrumentin Koto, ndërsa Rokufumi Izumi interpretoi pjesë të vallëzimit tradicional japonez.

Mbrëmjen japoneze e hapi ambasadori i Japonisë në Kosovë, Akira Mizutani, ndërsa në koncert mori pjesë edhe kryeministri i Kosovës Albin Kurti, i cili në një fjalë rasti tha se kultura është ura më e mirë ndërmjet kombeve.

Kurti tha se bashkëpunimi në mes të Kosovës dhe Japonisë në fushën e muzikës tashmë është i fortë dhe dirigjenti japonez Toshio Yanagisaëa, i cili është dirigjent i Orkestrës Filharmonike të Kosovës që nga viti 2007, ka dhënë një kontribut të madh në muzikën kosovare.

Artistja Suetomi aktualisht jeton në Istanbul dhe vazhdon aktivitetet e saj performuese dhe zhvillimin e studentëve të saj.

Mbrëmja japoneze në Prishtinë, e cila do të mbahet gjithashtu edhe nesër në një kolegj të kryeqytetit, përkrahet nga Ministria e Kulturës, Rinisë dhe Sportit e Kosovës dhe një nga sponsorët e saj është edhe Turkish Airlines.