Kosovë, arrestohen tre të dyshuar për terrorizëm

PRISHTINË (AA) - Drejtoria kundër terrorizmit në kuadër të policisë së Kosovës, dje ka arrestuar tre persona të dyshuar se kanë kryer veprën penale “Organizim dhe pjesmarrje në grupe terroriste” sipas nenit 143 paragrafi 2 të Kodit Penal të Republikës së Kosovës, njoftoi Ministria e Punëve të Brendshme të Kosovës, raporton Anadolu Agency (AA).

Të dyshuarit janë arrestuar në vendkalimin kufitar të Hanit të Elezit, pasi që në bashkëpunim janë kthyer nga autoritetet turke përmes Republikës së Maqedonisë.

Lidhur me këtë rast është njoftuar Prokurori kompetent dhe me autorizimin e këtij të fundit janë intervistuar tre të dyshuarit dhe gjithashtu si vazhdimësi e hetimeve me urdhër të Prokurorit dhe të gjyqtarit të procedurës paraprake janë bastisur edhe dy lokacione të të dyshuarve.

"Gjatë bastisjes në këto dy lokacione janë gjetur dëshmi relevante të cilat ndërlidhen me rastin dhe gjithashtu ndihmojnë në vazhdimësinë e hetimeve të këtij rasti", thuhet në njoftimin e MPB-së të Kosovës.

Me urdhër të prokurorit të tre personat e dyshuar janë ndaluar në qendrën e mbajtjes për 48 orë, deri në paraqitjen pranë gjykatës kompetente.