Ahmet Gürhan Kartal, Ekip
15 Shtator 2021•Përditësim: 16 Shtator 2021
Kryeministri britanik Boris Johnson njoftoi një ndryshim të madh në kabinetin e tij, transmeton Anadolu Agency (AA).
Gavin Williamson është bërë ministri i parë i lartë që u shkarkua nga pozita e Sekretarit të Arsimit.
“Ka qenë një privilegj të shërbej si Sekretar i Arsimit që nga viti 2019”, shkroi Williamson në Twitter.
“Pavarësisht sfidave të pandemisë globale, jam veçanërisht krenar për reformat transformuese që kam udhëhequr në arsimin post-16: në kolegjet e arsimit të mëtejshëm, agjendën tonë të aftësive, praktikat e mësimit dhe më shumë”, shtoi ai.
Robert Buckland është një tjetër ministër i lartë i larguar nga kabineti si Sekretar i Drejtësisë.
“Ishte një nder të shërbeja në qeveri për shtatë vitet e fundit dhe si Lord-Kancelar për dy vitet e fundit”, shkroi Buckland në Twitter.
Sekretari i Strehimit Robert Jenrick gjithashtu është hequr nga kabineti si Sekretar i Strehimit.
Në një zhvillim tjetër domethënës, Dominic Raab u largua nga pozita e Sekretarit të Jashtëm, por u emërua si Sekretar i ri i Drejtësisë dhe zëvendëskryeministër.
Raab kishte marrë kritika pasi ishte larguar me pushime gjatë marrjes së kontrollit nga talibanët në Afganistan muajin e kaluar dhe u fajësua për vonesë në evakuimin e qytetarëve britanikë nga vendi.
Zëvendësuese e Raab është Liz Truss, e cila ishte Sekretare e Tregtisë Ndërkombëtare.
“Elizabeth Truss është emëruar Sekretare e Shtetit për Punët e Jashtme, Komonuelthit dhe Zhvillimit. Ajo mbetet si ministre për Gratë dhe Barazitë”, tha Downing Street në një deklaratë në Twitter.
