Studim: Prodhimet e qumështit zvogëlojnë rrezikun e kancerit të zorrës

Qumështi dhe produktet e qumështit ofrojnë përfitime mbrojtëse kundër kancerit kolorektal, kryesisht për shkak të përmbajtjes së tyre të kalciumit, zbuloi një studim i ri, transmeton Anadolu.

Studiuesit nga Universiteti i Oksfordit publikuan sot një artikull në “Nature Communications”, duke zbuluar lidhjen e kundërt midis konsumit të qumështit dhe rrezikut të zhvillimit të kancerit të zorrëve.

Ata kanë analizuar marrëdhëniet midis 97 faktorëve dietikë dhe rrezikut të kancerit kolorektal në 542.778 gra pjesëmarrëse, të cilat përfshinin 12.251 raste incidenti gjatë 16,6 viteve.

Duke kryer një analizë gjenetike të synuar, studiuesit kanë zbuluar se konsumi i alkoolit dhe qumështit ka treguar lidhjet më të rëndësishme, ndjekur nga gjashtë faktorë qumështorë të lidhur me kalciumin.

Konsumimi i qumështit i parashikuar gjenetikisht është zbuluar të jetë i lidhur negativisht me rrezikun e kancerit kolorektal, të zorrës së trashë dhe rektalit. Përveç kësaj, konsumi më i lartë i alkoolit dhe mishit të përpunuar është shoqëruar me një rrezik në rritje të kancerit kolorektal.

Studimi ka arritur në përfundimin se produktet e qumështit ofrojnë përfitime mbrojtëse kundër kancerit kolorektal, kryesisht për shkak të përmbajtjes së tyre të kalciumit.

Kanceri kolorektal është kanceri i tretë më i përhapur globalisht, me rreth 1,9 milionë raste të reja të raportuara në vitin 2022, sipas studimit.

Normat e incidencës janë më të larta në zonat me të ardhura të larta si Evropa, Amerika e Veriut, Australia, Zelanda e Re dhe Japonia, dhe më të ulëta në rajonet me të ardhura të ulëta si Afrika dhe Azia Jugore.

Studiuesit kanë vënë në dukje se normat në zonat me incidencë më të ulët duket se po rriten.