John Heitinga merr drejtimin e Ajaxit deri në fund të sezonit

Klubi i futbollit Ajax nga Amsterdami emëroi John Heitinga si trajner të ri të enjten me kontratë deri në fund të sezonit pas shkarkimit të Alfred Schreuder javën e kaluar, transmeton Anadolu.

"Ajaxi dhe John Heitinga kanë rënë dakord që ish-futbollisti 39-vjeçar të mbetet trajner i Ajaxit deri në fund të sezonit", thuhet në deklaratën e gjigantit holandez.

Ish lojtari i Ajaxit, Heitinga ishte trajner i përkohshëm i klubit holandez fundjavën e kaluar gjatë duelit me Excelsior.

Gjithashtu raportohet se Dwight Lodeweges është emëruar ndihmës trajner.

Heitinga e filloi dhe e përfundoi karrierën e tij futbollistike në Ajax si dhe luajti për disa klube evropiane, përfshirë Atletico Madrid, Everton, Fulham dhe Hertha Berlin.

Ai shënoi shtatë gola në 87 ndeshje për kombëtaren holandeze.

Javën e kaluar, Ajaxi shkarkoi trajnerin Schreuder për shkak të rezultateve të dobëta këtë sezon.

Ajaxi aktualisht ndodhet në vendin e katërt në tabelën e Eredivisie me 37 pikë dhe është pesë pikë prapa liderit Feyenoord.