Oferta saudite për blerjen e Newcastle United ngjall polemika

Oferta prej 300 milion funtash e Arabisë Saudite për të marrë në dorë klubin anglez të Premier Ligës, Newcastle United, ka ngjallur kritika nga grupet e të drejtave të njeriut, si dhe nga rrjeti global i kanaleve sportive në pronësi dhe administrim të beIN Media Group me seli në Katar, raporton Anadolu Agency (AA).

Pronari aktual i Newcastle United, miliarderi britanik Mike Ashley, e nxori klubin në shitje në vitin 2017. Ai ka klubin në pronësi që nga viti 2007.

Nëse marrëveshja realizohet, fondi sovran i pasurisë i Arabisë Saudite, Fondi i Investimeve Publike (PIF), do të bëhej pronare e 80 për qind të aksioneve të klubit. Princi i kurorës Mohamed bin Salman është kryetari i PIF-së.

Pirateria dhe diplomacia

BeIN Sports theksoi se Arabia Saudite drejton një rrjet pirat televiziv që transmeton në mënyrë të paligjshme ndeshjet e Premier Ligës brenda mbretërisë dhe u bëri thirrje klubeve të Premier Ligës të mbrojnë pronën e tyre intelektuale dhe flukset e të ardhurave.

Rrjeti pirat saudit quhet beoutQ, ndërkaq, Premier Liga më parë i bëri thirrje transmetuesit satelitor shtetëror të mbretërisë Arabat që të ndalojë lejimin e beoutQ të shfrytëzojë frekuencat e tij për të transmetuar ndeshjet. Arabat ka mohuar që beoutQ shfrytëzon frekuencat e saj.

Transmetimet e pirate filluan në vitin 2017, kur Katari dhe shtetet e saj fqinje të Gjirit u futën në një konflikt diplomatik.

Shefi ekzekutiv i BeIN, Yousef al-Obaidly, u ka shkruajtur kryetarëve të klubeve të Premier Ligës, duke u thënë: "Legjitimiteti i shërbimit të paligjshëm do të vazhdojë të ndikojë në përparimin tuaj. Kur të fillon sezoni i Premier Ligës në muajt e ardhshëm, të gjitha përmbajtjet e transmetuesve të ligës do të vazhdojnë të jenë të disponueshme me lehtësi dhe në mënyrë të paligjshme përmes funksionalitetit të transmetimit IPTV në kutitë kryesore të beoutQ, të cilat u shitën në sasi të konsiderueshme në Arabinë Saudite dhe në rajonin më të gjerë të Lindjes së Mesme dhe Afrikës Veriore. Për më tepër, duke pasur parasysh efektin e ashpër ekonomik që i ka shkaktuar koronavirusi industrisë së sportit, e gjithë kjo po ndodh në kohën kur klubet e futbollit duhet të mbrojnë më shumë të ardhurat e tyre nga transmetimi".

Ai akuzoi Arabinë Saudite për "lehtësimin e vjedhjes së afër trevjeçare të të drejtave komerciale të Premier Ligës".

"Nuk është ekzagjerim të themi se modeli i ardhshëm ekonomik i futbollit është në diskutim", tha al-Obaidly.

Al-Obaidly gjithashtu i shkruajti Shefit Ekzekutiv të Premier Ligës, Richard Masters, ku thuhet: "Në atë masë sa janë të sakta raportet për blerjen e Newcastle United, ne e konsiderojmë të domosdoshme që Premier Liga të hetojë plotësisht blerësin e mundshëm të klubit, përfshirë të gjithë drejtorët, oficerët dhe përfaqësuesit e tjerë nga Arabia Saudite, PIF ose subjektet e tjera të Arabisë Saudite të përfshira, ose duke siguruar ndonjë financim për blerjen. Shihet se ka disa arsye pse kërkohet një hetim i tillë nga palët e tjera. Kërkesa jonë bazohet thjesht në vjedhjet në të kaluarën dhe të tanishmen të Arabisë Saudite të të drejtave të pronësisë intelektuale të klubeve tuaja dhe të anëtarëve tuaj".

Khashoggi dhe "larjet sportive"

Grupi i të drejtave të njeriut Amnesty International gjithashtu e ka kritikuar marrëveshjen e propozuar.

Në një letër të veçantë për Masters, drejtoresha e grupit në Britani, Kate Allen, ka thënë: "Premier Liga po rrezikon të bëhet e mashtruar nga ata që duan të shfrtyëzojnë shkëlqimin dhe prestigjin e futbollit të Premier Ligës për të mbuluar veprimet që janë thellësisht të pamoralshme, duke shkelur ligjin ndërkombëtar dhe në kundërshtim me vlerat e Premier Ligës dhe komunitetit global të futbollit".

Ajo e akuzoi Arabinë Saudite për përfshirje në "larje sportive" dhe theksoi vrasjen e tetorit të vitit 2018 të gazetarit saudit Jamal Khashoggi brenda konsullatës saudite në Stamboll, duke thënë: "Princi i Kurorës (Mohamed Bin Salman) ka përdorur ngjarje dhe personalitete sportive si një mjet të përmirësimit të reputacionit të mbretërisë pas vrasjes makabre të gazetarit Jamal Khashoggi, e cila besohet gjerësisht se ka ndodhur me miratimin e tij".

"Asociacione të tilla pozitive me ngjarje sportive gjithashtu largojnë vëmendjen nga regjistri i tmerrshëm saudit i të drejtave të njeriutt, përfshirë burgosjen dhe torturimin e grave mbrojtëse të të drejtave të njeriut", tha ajo.

Mediat lokale raportuan se përkundër polemikave, marrëveshja megjithatë pritet të ec përpara.