Rritet në 17 numri i të vdekurve nga shembja e ndërtesës në Stamboll

STAMBOLL (AA) - Numri i të vdekurve nga shembja e ndërtesës në Stamboll tre ditë më parë është rritur në 17, pasi ekipet e shpëtimit kanë nxjerrë trupa të tjerë nga rrënojat, njoftoi ministri i Shëndetësisë i Turqisë, Fahrettin Koca, raporton Anadoli Agency (AA).

• Erdoğan viziton vendin e fatkeqësisë në Stamboll: Duhen nxjerrë mësime

Koca, vizitoi spitalin ku trajtohen personat e plagosur nga shembja e ndërtesës në Lagjen Kartal të Stambollit. Ai mori informacione në lidhje me gjendjen e tyre nga doktorët e spitalit.

"Numri i qytetarëve që kemi humbur është rritur në 17", tha Koca në deklaratën për gazetarët.

Ai shtoi se nga 13 persona të plagosur, 7 gjenden në kujdesin intensiv.

Ndërtesa shtatë katëshe në lagjen Kartal të Stambollit u shemb të mërkurën me rreth 30 banorë brenda për arsye ende të panjohura.