Vuçiç vizitë në Parlamentin e Turqisë

ANKARA (AA) - Presidenti i Serbisë, Aleksandar Vuçiç, vizitoi Parlamentin e Turqisë, ku u takua me kryeparlamentarin Ismail Kahraman, raporton Anadolu Agency (AA).

Në fjalën e tij gjatë takimit, Kahraman u shpreh i gëzuar nga vizita e presidentin serb dhe delegacionit shoqërues.

"Në mes nesh ka një miqësi të vërtetë. Ju dhe presidenti Recep Tayyip Erdoğan mbyllët distancën gjeografike në mes dhe sollët një tërësi shpirtërore", tha Kahraman.

Ndërkaq, presidenti serb Vuçiç tha se kanë forcuar miqësinë mes dy vendeve me kontributet e holomogut të tij turk Erdoğan.

"Tanimë nuk ka prishje urash, por ndërtojmë ura. Miqësia që ai ndërtoi me vizionin e tij në Ballkan dhe rajonin tonë do të ekzistojë dhe do të mbetet e përhershme", tha Vuçiç.

Ai tha se marrëdhëniet mes Turqisë dhe Serbisë janë në nivel shumë të mirë, duke theksuar se këto marrëdhënie do t'i avancojnë edhe më tej dhe se fushat e bashkëpunimit mes dy vendeve janë të shumta.

Presidenti serb u shpreh se duhet të veprojnë në mënyrë të shpejtë, efektive dhe të fuqishme në çdo fushë, përfshirë politikën, ekonominë dhe kulturën.

"Ne kemi shumë fusha bashkëpunimi dhe kapacitete", shtoi Vuçiç.

Pas takimit, i shoqëruar nga kryeparlamentari turk Kahraman, Vuçiç vendosi lule në pjesën e dëmtuar të Parlamentit gjatë tentativës së FETO-s për grusht shteti më 15 korrik të vitit 2016.

Po ashtu, Kahraman e informoi Vuçiçin në lidhje me ndodhitë në parlament.

Vuçiç dhe Kahraman më pas kaluan në një drekë pune të shturar në nder të presidentit serb.

Gjatë vizitës në parlament, Vuçiç u shoqërua edhe nga zëvendëskryeministri i Turqisë, Fikri Işık.